Barku di Marina Zr.Ms. Karel Doorman ta yuda Karibe
Barku di marina Zr.Ms. Karel Doorman ta sali djaluna awor for di Den Helder rumbo pa Karibe. Marina Real ta pone e barku aki disponibel pa sostené outoridatnan sivil den e krísis di corona, ora e situashon rekerí esaki. Lo manda e barku aki inisialmente pa un durashon di tres luna.
Ku presensia di e barku logístiko pa duna asistensia aki, banda di Zr. Ms. Zeeland, e islanan por kai bèk riba un kapasidat disponibel ku ta amplio i rápido. Zr. Ms. Doorman por ofresé sosten den transporte pa por ehèmpel garantisá seguridat di alimentashon. Banda di esei e barku di marina aki por sostené wardakosta ku vigilansia marítimo di nos fronteranan i e por yuda komo base pa sostené órden públiko dor di pone personal i material rápido riba tera.
Finalmente e barku tin fasilidatnan médiko tambe pa sostené e salubridat lokal ora ta trata kasonan di emergensia ku no ta relatá na COVID.
E gobièrnunan lokal den Karibe ku ta forma parti di Reino, durante e último simannan, a entregá diferente petishon pa asistensia na Defensie, pa sostené e kombatimentu di e vírùs di Corona. Aktualmente Defensie ta sostené kaba ku unidatnan lokal pa entre otro vigilá fronteranan marítimo i pa mantené e órden públiko. Ku Zr. Ms. Doorman den serkania, Defensie ta sòru ku sosten èkstra por yega rápido, na momento ku hasi un petishon pa esaki.
Zr. Ms. Karel Doorman banda di su propio kapasidat di barku di transporte i di suministrashon, tambe ta reforsá ku 2 helikòpter Cougar di forsa aéreo pa transporte médiko i evakuashon médiko, un tim médiko ku kapasidat di hasi operashon, un tim médiko pa kuido básiko na tera i ‘drones’ di ehérsito i di marina pa konstrukshon di imágen. Banda di esei lo bai tambe unidatnan di marina ku vehíkulonan i lanchanan di desembarkamentu. Si ta nesesario por laga buska un unidat di marina èkstra. E barku ta hiba tambe pakete di emergensia pa orkan.
Fransia i Reino Uní (UK), tambe tin un barku di marina den region. Ku e paisnan aki a establesé un sélula di kordinashon na Martinique pa si tin mester, nan traha huntu. Asina Karel Doorman por suministrá kombustibel na e barkunan aki.