Gezaghèber ta sòru pa pueblo keda informá tokante vírùs di Corona
A tuma e promé medidanan pa ku prevenshon di e vírùs COVID-19 e siman aki na Boneiru. Entrante ayera a ekspandé restrikshonnan riba tráfiko aéreo pa minimalisá e riesgo di infekshon di pafó. E Tim di Maneho Insular (Eilandelijk Beleidsteam, EBT) ta reuní diariamente pa hiba kombersashon tokante medidanan adishonal i ta informá Konseho Insular i Kolegio Ehekutivo.
Gezaghèber Rijna ta presidí EBT, ku ta konsistí tambe di e hefenan di servisio i direktornan di diferente organisashon operashonal, manera Polis, Marechaussee, Brantwer, Fundashon Mariadal, Ministerio Públiko, Representante di Reino Suplente i e Sekretario Insular Suplente. Durante di e reunion aki e partidonan ligá ta tene kòmbersashon tokante medidanan ku ta nesesario i posibel pa garantisá e seguridat di habitantenan riba e isla.
Diariamente EBT lo komuniká tokante e último estado aktual di e vírùs. Via tres kanal fiho lo kontestá mas tantu pregunta posibel. Esakinan ta e wèpsait di RCN (https://www.rijksdienstcn.com/ covid-19) i e página di Facebook di OLB ‘Gobièrnu di Boneiru’ i di RCN ‘Rijksdienst Caribisch Nederland’. Lo empeñá radio i medionan sosial tambe pa distribuí e Q&A’s (pregunta- i kontestanan) via oudio. E informashon ta optenibel na Hulandes, Papiamentu, Ingles i Spañó.
Lo komuniká formashon di desishon mas aleu via di un ‘statement’ di prensa òf un konferensia di prensa. OLB i RCN ta hasi un supliká na un i tur pa saka informashon for di e fuentenan menshoná i pa ta alèrt pa notisia ‘fake’ pa prevení kreashon di pániko innesesario.