RCN ta tuma medidanan di prekoushon en konekshon ku vírùs di corona
Na Hulanda Karibense ainda no a detektá infekshon ku e vírùs di corona. Tòg Rijksdienst Caribisch Nederland ta tuma medidanan preventivo pa hasi e chèns riba distribushon mas chikí posibel. Naturalmente tur servisio di reino ta keda habrí normal i ta sigui brinda servisio na siudadano.
Jan Helmond, direktor di Rijksdienst Caribisch Nederland: “Naturalmente nos no ta sera. Esei lo bai a kosto di habitantenan di Hulanda Karibense. Hustamente den tempunan di krísis nos komo gobièrnu mester keda aksesibel; sigur kaminda esnan ménos fuerte den nos komunidat mester di nos ayudo i protekshon. Pero mas ku klaro nos ta tuma medidanan preventivo si pa protehá habitante i nos empleadonan mas tantu posibel.”
Kolaboradónan di bali i otro empleadonan ku tin hopi kontakto ku siudadanonan, ta èkstra alèrt riba medidanan di higiena ku ta konta pa tur hende, manera laba man, tene distansia i nó duna man. Miéntras tantu nan tin akseso na atributonan di higiena èkstra. Kaminda por, ta duna servisio via di telefòn òf e-mail en bes di na bali. Asina e dòkter di seguro di SZW por ehèmpel no ta risibí pashènt mas pero ta tene konsulta via di telefòn. ZVK ta pidi aseguradonan pa manda e-mail pa kambia dòkter di kas, pa pidi prueba di inskripshon i pa entregá deklarashonnan. Den e periodo benidero por mira tur kambio den dunamentu di servisio di departamentunan di RCN na Boneiru riba: www.rijksdienstcn.com/covid-19.
Si un persona tin molèster di ferkout di nanishi, doló di garganta, tosamentu òf kentura, ta konta pa tur departamentu di Rijksdienst Caribisch Nederland ku ta pidi e kliente pa nó bishitá e ofisina di Reino. Tambe si tin persona ku den e último simannan a regresá for di un área di riesgo, ta pidi nan pa keda kas konforme e indikashonnan di e departamentu di Salubridat Públiko di Entidat Públiko Boneiru. E ora ei ta yuda klientenan via di e-mail òf telefòn.