Salubridat públiko: ‘Tin sentido pa tèst masalmente pa e virùs Corona?”
Via medionan sosial tin hopi opinion ta kore tokante tèstmentu si òf nò di e virùs Corona. Hopi hende ta di opinion ku lo mester tèst masalmente. For di e departamento di Salubridat Públiko nos ta aklará e maneho di tèst.
Protokòl médiko internashonal
A instalá un protokòl médiko internashonal a base di konosementu sientífiko i di eksperensia na otro kaminda. Segun e protokòl médiko aki ta konsiderá kuidadosamente ki ora ta realista pa tèst i ki ora esaki no ta nesesario. Un hende ku no a bini den kontakto ku e virùs no por haña e enfermedat di Corona. Si tin keho ku por indiká e enfermedat Corona (keintura + tosamentu òf problema di rosea) mester yama dòkter di kas.
Diagnostiká
E dòkter di kas konosé e historia di e pashèntnan. Dòkter di kas ta evaluá e kehonan i den kaso di duda ta tuma kontakto ku e spesialista di enfermedat kontagioso. E dòkter aki ta evaluá e pashènt di nobo i ta buska, huntu ku e Departamento di Salubridat Públiko, si òf ki ora e pashènt por a bini den kontakto ku un pashènt di Corona. Por ehèmpel por ta asina ku e pashènt tabata den un área di riesgo e último dos simannan. Hende ku tabata den un área di riesgo mas ku dos siman pasá no por ta kontagioso i no tin nodi di tèst nan. E tempu di inkubashon di e virùs ta varia entre 2-12 dia. Pa tuma un márgen seif ta mantené dos siman.
Tèst preventivo masalmente?
Si no tin síntoma no tin niun sentido pa tèst, tampoko ora tin algun keho. Tin hopi diferente manifestashon di enfermedat ku parse e kehonan manera di e virùs Corona. Ta keda na e ekspertisio di e médiko pa husga esaki. Pa prosedé pa tèst mester tin un motibu.
Si tin un riesgo real ku tabatin kontaminashon ta tuma e tèst. E ora ei mésora e pashènt ta bai den isolashon te ora ku e resultado di e tèst ta konosí. Si esaki ta positivo lo kontinuá e isolashon. Asina ta hasi e chèns di infektá otro hende mas chikí. Te ainda no a establesé niun kaso di Corona na Boneiru.
Kantidat di material pa tèst
Aktualmente tin sufisiente material pa tèst i pa protekshon na Boneiru. Nos no sa kon largu e situashon aki lo dura i kon e sùplai lo bira den futuro, p’esei ta anda ku prudensia ku e materialnan optenibel. E partimentu i entrega pa Hulanda Karibense ta kordiná pa VWS via RIVM i Salubridat Públiko Boneiru.