SZW ta duna empresarionan espasio pa reanudá
Dunadónan di trabou ku ta hasi uso di e areglo di emergensia di SZW pa haña sosten den nan gastunan di suèldu, no mester hasi notifikashon di kambio mas pa e restu di e periodo ku e areglo ta na vigor. Di e forma akí nan ta haña mas espasio pa wak si i di ki forma nan por amplia nan aktividatnan komersial atrobe. Lo no prosesá formularionan di kambio entregá kaba, a ménos ku nan ta den bentaha di e petishonario.
E suavisashon di medidanan relashoná ku kombatimentu di corona ta duna kompanianan mas posibilidat. Pero, pa motibu di distansiamentu sosial i ousensia temporal di turistanan, e merkado a kambia. Unidat di SZW di RCN kier duna dunadónan di trabou te ku 12 di yüni espasio, pero miéntras tantu e nivel di e apoyo lo no kambia. Ta na e dunadónan di trabou pa huntu ku nan empleadonan yega na palabrashonnan tokante ponementu di personal na trabou atrobe.
Na e momentu akí ta negoshando huntu ku Ministerio di SZW riba prolongashon di e areglo di emergensia. Si ta kontinuá ku e areglo bou di eksaktamente e mes kondishonnan, ta tópiko di kombersashon ainda. Asina stipulá e areglo nobo e unidat di SZW lo duna informashon tokante esaki.
Empresarionan independiente ku ta hasi uso di e areglo di emergensia di SZW mester hasi notifikashon di kambio si nan entrada kambia den e periodo te ku 12 di yüni 2020, pa por adaptá e suplemento di ingreso na e situashon nobo. Trahadónan ku pa motibu di corona a pèrdè nan trabou i ta hasi uso di e areglo bou di nan propio nòmber, tambe mester yena e formulario di kambio na momentu ku nan tin trabou atrobe.
Mas informashon tokante e areglo di emergensia ta disponibel riba www.rijksdienstcn.com/covid-19. Empresarionan na Boneiru por dirigí nan mes pa konseho na Kámara di Komersio via steunloket@KvKbonaire.com.