Alivio finansiero pa famia i kompanianan na Hulanda Karibense

Notisia | 05-05-2020 | 21:29

E alivio finansiero ta na vigor te fin di e aña akí i tin komo meta pa redusí e gastunan básiko di kosto di bida pa abitantenan di Hulanda Karibense.

Asina Ministerio di Asuntu Interno i Relashon den Reino di Hulanda a anunsiá siman pasá. Ku e medida di Corona akí tin un suma insidental di 7,8 mion euro reservá. Ministerio di Asuntu Ekonómiko i Klima (pa elektrisidat) i Ministerio di Infrastruktura i Maneho di Awa (pa awa di bebe) ta kontribuí ku e suma akí.

E kompanianan di utilidat ta prosesá e redukshonnan di tarifa outomátikamente. Abitantenan mes no mester hasi òf pidi nada.

Abonadonan ta ripará e alivio pa gastu di elektrisidat i awa di bebe un luna despues numa (na yüni), pasobra ta manda mayoria faktura di konsumo pa luna di mei un luna despues.

Pa tur kas di famia i kompania ta konta ku den e periodo di mei te ku desèmber 2020 ta duna un kompensashon insidental pa elektrisidat i awa di bebe. E kompensashon akí ta sòru pa e tarifa fiho pa uso ta sero dòler den e periodo ei. Den e periodo ei mester paga solamente e gastunan pa uso di elektrisidat i awa di bebe. Dependiendo di e tipo di konekshon, e loke ta spar ta diferensiá. Pa tur konekshon di internèt ta na vigor un deskuento mensual di 25 dòler pa luna pa tur abonado.

Boneiru

Pa kasnan di famia ku un konekshon standart, esei ta nifiká un alivio total di e peso finansiero di 58,26 dòler pa luna.

Sint Eustatius

Pa kasnan di famia ku un konekshon standart, esei ta nifiká un alivio total di e peso finansiero di 53,56 dòler pa luna.

Saba

Pa kasnan di famia ku un konekshon standart, esei ta nifiká un alivio total di e peso finansiero di 44,13 dòler pa luna. Na Saba no tin un ret di awa di bebe. Na lugá di un deskuento riba e kuenta di awa di bebe a pone plaka disponibel pa Saba amplia e kapasidat pa almasenamentu di awa (cisternes).