Spich Gezaghèber Edison E. Rijna 05-05-2020
Kerido ko-siudadano,
E sifranan te ku awe pa loke ta trata e situashon di COVID-19 ta ku a tèst 257 i no tin niun kaso a bini aserka.
Manera ya a anunsiá awe i djaweps tin e COVID drive Thru i asina ke sigui tèst mas hende pa nos tin sigur ku e vírùs no ta aktivo mas riba nos isla na e momentunan aki.
Lenk pa bai na e konferensha d prensa
Entrante mayan lo suavisá algun di e medidanan di e ordenansa di lei di emergensia relashoná ku COVID-19. Komunidat a reakshoná sumamente positivo riba e adaptashon ku nos a anunsiá djabièrnè último. E echo ku entrante mayan nos lo por bai hasi mas manera bai gym i bai skol no ta nifiká ku nos ta bai bek na e situashon promé ku corona. Ta responsabilidat di kada un di nos pa sigui tene nos mes i nos famia di forma estrikto na e regla di distansia sosial i di higiena. Nos mester aseptá ku nos bida a kambia i ku e kambionan aki lo por dura pa basta tempu.
Awe mi lo ta kòrtiku den mi disertashon pa asina krea mas espasio pa diputado Nina den Heyer di asuntunan sosial i Elvis Tjin Asjoe diputado di finansa duna informashon tokante temanan sumamente importante pa kada siudadano di nos isla. Ta trata di e esfuersonan ku Kolegio Ehekutivo a i ta hasiendo pa minimalisá e impakto sosial-ekonómiko riba isla relashoná ku e krísis di corona.
Por último un yamada na un i tur pa den e fase nobo ku nos ta bai drenta mayan kada un di nos ta corona-smart. Esta tene nos mes na e regla di distansia sosial, higiena personal i no mas ku 50 hende huntu na un sitio. Asina nos ta sigui den e lucha huntu kontra corona.