Progreso repatriashon di residente
Despues di evaluashon di e promé grupo di repatriante ku a yega riba 17 di aprel tras di lomba, e siguiente buelo di repatriashon ta yega Boneiru riba 10 di mei. Ta trata di residentenan ku tabata pegá na Estádos Unídos i Aruba. Mirando e kompleksidat logístiko ta ahustá e planiashon di repatriashon kasi diariamente.
For di Estádos Unídos a mèldu 42 i for di Aruba 12 residente di Boneiru ku ta bini na remarke pa repatriashon. Komo ku e konsulado di Merka na Kòrsou, ta organisá un buelo pa Aruba pa repatriá siudadanonan merikano, Aruba, Kòrsou i Boneiru a hasi uso di e posibilidat aki pa trese nan mes residentenan pegá, kas bèk. E buelo ta sali di Fort Lauderdale pa Aruba. For di Aruba komo konekshon ta pone un charter disponibel pa trese e residentenan bèk Boneiru. A informá residentenan tantu na Merka komo na Aruba tokante e posibilidat pa hasi uso di e buelo aki.
Den un otro planiashon konsepto anterior di e ‘taskforce’ di repatriashon, a investigá e posibilidat pa trese personanan for di Colombia i Repúblika Dominikana bèk. Esaki a resultá di ta inalkansabel na e momentunan aki, tambe dor di e ‘lock-down’ aktual na Repúblika Dominikana. E repatriashon di residente for di Colombia si ta progresando, entretantu 20 residente a bini bèk.Ta trese e sobrá residentenan na Colombia bèk, asina ku e kapasidat di kuido i akohida ta permití esaki.
Proseso kompliká
Pa limitá e plamamentu di corona vírùs, ta di gran importansia pa e repatriashon tuma lugá na un manera kontrolá i den fase. Komo ku tin mas di 250 residente partí ofer di mas di 20 diferente pais, e parti logístiko ta un proseso kompliká. Tin ku tene kuenta ku e medidanan lokal di e diferente paisnan, buelonan disponibel i e manera mas efisiente pa uza esakinan. Na mes momentu mester prevení ku ta sobrekargá e kapasidat lokal di kuido i akohida. P’esei ta revisá e planiashon kasi diariamente.
Na e momentunan aki ta trahando riba ampliashon di e kapasidat di kuido i akohida lokal, pa asina por repatriá gruponan mas grandi pareu i asina por aselerá e proseso di trese tur hende bèk. Sinembargo e situashon mundial ta kambia diariamente. P’esei ta informá residentenan ku ta pegá den eksterior personalmente asina ku tin un fecha konkreto pa e promé vuelo siguiente i si nan ta bin na remarke pa esaki.