Servisionan di RCN ta kontinua den forma adaptá
Rijksdienst Caribisch Nederland (RCN) ta sigui brindá servisio na siudadanonan di Hulanda Karibense i ta keda disponibel via di telefòn i meil. Si no por otro, ta yuda bishitantenan na bali ku mantenshon di distansia di mínimo di 1.5 meter i ku medidanan adishonal pa prevení posibel kontagio di e vírùs.
Jan Helmond, direktor di Rijksdienst Caribisch Nederland: “Naturalmente nos no ta sera. Esei lo bai a kosto di siudadanonan di Hulanda Karibense. Hustamente den tempunan di krísis nos komo gobièrnu mester keda aksesibel; sigur kaminda esnan vulnerabel den nos komunidat mester di nos ayudo i protekshon. Pero mas ku klaro nos ta tuma medidanan preventivo si pa protehá siudadanonan i nos empleadonan. Nos ta pidi komprenshon si esaki ta nifiká ku ta brindá nos servisionan na un manera diferente for di kustumber.”
Si ta posibel, kolaboradónan di RCN ta traha for di kas, di akuerdo ku e petishon di gezaghèber di Boneiru. Solamente si ta nesesario, pa garantisá prestashon di servisionan krítiko, e kolaboradónan di RCN lo traha na nan lokashon nòrmal. Tur kambio den e dunamentu di servisio Rijksdienst na Boneiru, por haña riba https://papiamentu.rijksdienstcn.com/covid-19/servisionan-di-gobiernu.
Bishita na bali limitá
Pa protegá tantu suidadanonan i empleadonan, ta brindá hopi servisio via di telefòn òf online, en bes di na bali. Por ehèmpel, ofisina di impuesto i duana ta temporalmente sera debí na kasonan positivo di e vírùs di corona; ta duna asistensia via di telefòn i meil. E dòkter di seguro di SZW ta tene konsulta via di telefòn. ZVK ta pidi aseguradonan pa manda meil pa kambia dòkter di kas, pa pidi prueba di inskripshon i pa entregá deklarashonnan. Jeugdzorg, Voogdijraad i IND ta risibí bishitante solamente ku sita previo. Polis ta atendé ‘aangifte’ kaminda ta posibel telefónikamente. Tur kambio den dunamentu di servisio i datonan di departamentunan di RCN na Boneiru, por haña riba: https://papiamentu.rijksdienstcn.com/covid-19/servisionan-di-gobiernu.
Si un persona tin molèster di ferkout (ku korementu di nanishi), doló di garganta, tosamentu òf keintura, ta pidi e kliente pa nó bishitá e ofisina di Reino. Esaki ta konta pa tur departamentu di Rijksdienst Caribisch Nederland. Tambe si tin persona ku den e último simannan a regresá for di un área di riesgo, ta pidi nan pa keda kas konforme e indikashonnan di e departamentu di Salubridat Públiko di Entidat Públiko Boneiru. E ora ei ta yuda klientenan via di meil òf telefòn.