Mi ta dunadó di trabou

Kiko e areglo di emergensia di SZW enserá?
Komo dunadó di trabou bo por haña un kompensashon di e gastunan di salario di trahadó ku bo no por tene na trabou (kompletamente) pa motibu di e vírùs corona. Mester trata di pèrdida di volúmen di benta di por lo ménos binti porshento relatá na e vírùs corona ku e konsekuensia ku bo no por tene bo personal na trabou (kompletamente). Den kaso di otorgamentu lo kompensá ochenta porshento di e salario di e trahadó pa e oranan ku e no ta traha pa bo. E porsentahe aki posiblemente ta kambia na yanüari 2021. Bo mester raportá e montante bruto. Un salario máksimo pa dia ta na vigor.


Kon largu mi por keda hasi uso di e areglo aki?
Na promé instante e areglo tabata pa un periodo di tres luna, di 13 di mart te ku 12 di yüni 2020. Despues a prolongá e areglo ku kuater luna te ku 12 di òktober 2020. A bolbe prolongá e areglo te ku 12 di yüli 2021. E periodo mas largu aki ta duna trankilidat i seguridat. Na mes momento posiblemente lo redusí e sosten un poko. Kompania i empleadonan mester sigui adaptá nan mes na e situashon ku ta kambia. 


Kiko ta kambia pa mi den e di tres fase komo dunadó di trabou?
- Por prosesá un aplikashon nobo pa máksimalmente kuater siman retroaktivo;
- Empleadonan ku ta kai bou di e areglo no por permanesé pafó di Hulanda Karibense pa mas di kuater siman durante e término di e areglo;
- Empleadonan pa kua bo no ta prolongá e kontrakt, por hasi uso di e areglo di emergensia riba nan propio nòmber pa máksimalmente tres luna.


Mi ta hasi uso kaba di e areglo di emergensia. Mi mester hasi algu pa bini na remarke pa e di tres fase?
No. Si bo ta hasi uso kaba di e areglo, bo no mester hasi nada pa bini na remarke pa e di tres fase.


Kiko mi mester hasi si mi situashon kambia?
Den kaso di kambionan importante, bo mester mèldu esaki via e formulario di kambio


Mi por kita personal pasobra e volúmen di benta ta baha?
E areglo di emergensia si SZW ta intenshoná pa evitá ku hende ta pèrdè nan trabou. Na mes momentu ta importante pa empresanan adaptá nan mes na e situashon ku ta kambia. Den algun kaso kompanianan lo mester restrukturá di tal forma ku kitamentu di empleado for di trabou ta inevitabel.

Durante fase tres di e areglo di emergensia, e provishonnan regular ku tin di aber ku retiro ta aplikabel atrobe. Esei ta nifiká ku e dunadó di trabou por pidi retiro na unidat SZW di RCN òf serka hues. Den evaluashon di e solisitut pa retiro lo konsiderá e situashon spesífiko i lo tene na kuenta ku tin areglonan di emergensia ku e dunadó di trabou por hasi uso di dje.


E areglo di emergensia no ta ofresé un kompensashon kompleto pa e gastunan di salario. Mi mes mester paga e sobrá suma?
Pa kleim e areglo di emergensia, bo ta obligá di paga bo empleado(nan) mínimalmente e suma ku SZW ta pagá bo. NB: E areglo di emergensia no ta pone loke ta stipulá den Kódigo Sivil (Burgerlijk Wetboek BES) un banda. Aplikashon di e Kódigo Sivil ta den ámbito di lei di derechi privá, kual unidat SZW di RCN no tin bos riba dje. Nos ta rekomendá bo pa papia ku bo empleado(nan) tokante e parti sobrá di e salario i pa drenta akuerdo konhunto tokante esaki. Esaki ta yuda komprondé otro su posishon i tene na kuenta e interes komersial poné kontra kontinuidat di entrada di e empleado(nan). (Por lesa esaki den artíkulo 1614d, Burgerlijk Wetboek BES).


E areglo aki ta aplikabel solamente pa empleado ku trabou fiho?
No. Bo por entregá un petishon tambe pa empleado ku un kòntrakt di sero ora òf un kòntrakt temporario.


Mi por tuma empleado nobo den servisio i mesora pone nan bou di e areglo di emergensia?
Nò. E areglo di emergensia ta pa yudá bo tene bo empleadonan den servisio, ku tabata traha p’abo kaba promé ku e krísis di corona a kuminsá. Si bo skohe pa tuma empleado nobo den e temporada aki, bo mester paga nan salario bo mes.


Mi por mantené e empleado(nan)  pa kua mi ta hasi uso di e areglo aki na trabou?
Punto di salida ta ku esaki no por pa e kantidat di ora ku bo ta registrá nan bou di e areglo. E oranan ku bo empleadonan ta  traha pa bo, en prinsipio bo mes mester paga.

Eksepshonnan ta posibel. Bo por entrega un petishon na unidat SZW den kua bo ta splika pakiko un eksepshon den bo kaso ta nesesario, i pa kua empleado. Por trata por ehèmpel e situashon ku bo aktividatnan a para ketu por kompleto, pero ku mester hasi trabounan nesesario pa por habri bèk despues di e krísis.

Por trata tambe trabounan nesesario durante ku bo kompania ta habri bèk, miéntras ainda merkado ta opstakulisá pa e krísis di corona.

SZW ta evaluá pa kada petishon si, i pa kua parti di e empleadonan tòg por risibí supsidio miéntras ku nan ta trahando.

Dunadónan di trabou por manda nan petishon pa noodregelingszw@rijksdienstcn.com. Den e petishon mester splika en todo kaso pakiko e trabounan ta esensial, kua empleado lo ehekutá nan, nan funshon i e kantidat di ora pa siman ku nan lo traha atrobe .


Mi por tene empleado partaim den servisio?
Si. Por ehèmpel bo por tene bo empleadonan na trabou pa 50% i pa e sobrá 50% bo ta kleim e areglo di emergensia aki.


Ta relevante ki tipo di forma di hurídiko mi organisashon tin?
Nò. Tur empleado ku ta kumpli ku e kondishonnan por bini na remarke pa e kompensashon.


Mi mester keda paga mi primanan usual di dunadó di trabou?
Si.


Kiko mi mester hasi si un empleado pa kua mi ta risibí kompensashon bira malu òf tuma ferlòf di embaraso?
Bo no por hasi un pedido pa pèrdida di suèldu pa e empleadonan pa kua bo ta hasi uso kompletamente di e areglo di emergensia aki. Pasobra bo ta risibí kompensashon kaba pa e gastunan di salario. Riba e promé dia di enfermedat nan mester mèldu serka e dòkter di kas i riba e di tres dia (telefónikamente) serka e dòkter di seguro.


Mi no a hasi uso anteriormente di e areglo di emergensia. Kon mi por entregá un petishon nobo komo dunadó di trabou?
Relashoná ku social distancing nos ta pidi tur hende pa hasi un petishon digital. Nos mester pone bo salú i di nos empleadonan na promé lugá.

Si bo no a hasi uso anteriormente di e areglo di emergensia, bo mester yena, firma i e-mail e formulario di petishon pa dunadó di trabou pa noodregelingszw@rijksdienstcn.com. Bo mester manda un kopia di bo sédula bálido athunto.

Si bo mester di sosten ku bo petishon, bo por dirigí bo mes na Kámara di Komèrsio (na Boneiru) via di e e-mail steunloket@kvkbonaire.com.


Ki ora mi ta risibí e kompensashon?
Den kaso di asignashon e unidat SZW di RCN lo pagá bo e kompensashon mensualmente. E término legal pa e promé pago ta máksimalmente sinku siman. Unidat SZW di RCN ta aspirá pa paga bo mas lihé.


Pa kuantu tempu mi por hasi uso di e areglo di emergensia aki?
Te ku 12 di yüli 2021. E periodo mas largu aki ta duna trankilidat i seguridat.Na mes momento kompania i empleadonan mester sigui adaptá nan mes na e situashon ku ta kambia.  Bo mester hasi tur esfuerso pa redusí uso di e areglo aki.


Te ki dia mi por entregá un petishon nobo?
Pa e periodo di 13 di yüni te ku 12 di òktober 2020, bo por entregá un petishon ainda te ku 12 di novèmber 2020. Pa e periodo di 13 di òktober 2020 te ku 12 di yüli 2021 bo por entrega un petishon durante durashon di e areglo. Ta paga te ku máksimalmente kuater siman retroaktivo.


Kiko ta pasa si mi no paga e suma ku mi risibí di SZW na mi empleado(nan)?
Den e kaso ei bo ta kometé un krímen. Esaki tin konsekuensia penal.