Mi ta dunadó di trabou
Kiko ta kambia pa mi komo dunadó di trabou den e prolongashon di 13 di yüli te ku 12 di òktober 2021?
- E prohibishon riba trabou ta kanselá. Asina bo empleadonan por traha bèk (fultaim), miéntras ku bo ta keda risibí sosten pa pago di bo gastunan di salario.
- E porsentahe ku ta kubri, ta baha. Aktualmente ta paga 80% di gastunan di salario di e empleadonan. Durante di e prolongashon ta supsidiá 60%.
- No por apliká pa e kompensashon pa empleado nobo. E prolongashon ta konta solamente pa empleadonan ku riba e fecha di referensia 24 di yüni 2021 ya tabata kai bou di e areglo di emergensia di SZW.
Mi mester hasi algu pa por hasi uso di e prolongashon?
No. Pa empleadonan ku riba e fecha di referensia 24 di yüni 2021 ya tabata kai bou di e areglo, e supsidio ta sigui kore. Si mester tin por lo ménos 20% di pèrdida di volúmen di benta i e empleadonan en kuestion ainda mester ta den servisio.
Mi mester informá tokante kambio durante di e prolongashon?
No mester informá tokante kambionan den empleado ku ta traha. Bo por laga tur empleado ku bo ta risibí supsidio di salario p’e, traha fultaim miéntras bo ta sigui risibí e supsidio.
Solamente si bo tin empleado bou di e areglo di emergensia ku bo no ta tene den servisio mas, òf si bo no ta kumpli mas ku e pèrdida di volúmen di benta di 20% komo konsekuensia di e krísis di corona, bo mester mèldu esaki na unidat SZW di RCN. Keda sin informá tokante kambio por tin konsekuensia penal.
Empleadonan ku mi a pone bou di e areglo partaim, mi mag pone nan abou fultaim?
No. Bo no por amplia e uso di e areglo di emergensia kompará ku e fecha di referensia 24 di yüni 2021.
Mi ta hasi uso di e ‘suavisashon pa dunadónan di trabou mas afektá’. Esaki tambe ta sigui kore durante e prolongashon?
Suavisashon òf eksepshonnan eksistente no ta na vigor mas, pasó den e prolongashon ta bira posibel pa laga bo empleadonan traha bèk fultaim ku mantenshon di e supsidio.
Mi por retirá personal si mi volúmen di benta baha?
Durante di prolongashon di e areglo di emergensia e kondishonnan regular pa renunsia ta na vigor. Esei ta nifiká ku komo dunadó di trabou bo por hasi aplikashon pa retiro na unidat SZW di RCN òf serka un hues. Ora ta revisá e petishon pa retiro, ta mira e situashon spesífiko i ta tuma den konsiderashon ku tin areglonan di emergensia.
E areglo di emergensia no ta duna kompensashon kompleto di gastu di salario. Mi mes mester paga e sobrá montante?
Pa por bini na remarke pa e areglo di emergensia, bo ta obligá pa por lo ménos paga e montante ku bo ta risibí di SZW, na bo empleado. NB: E areglo di emergensia no ta pone loke ta stipulá den Kódigo Sivil (Burgerlijk Wetboek BES) un banda. Aplikashon di e Kódigo Sivil ta den ámbito di lei di derechi privá, kual unidat SZW di RCN no tin bos riba dje. Nos ta rekomendá bo pa papia ku bo empleado(nan) tokante e parti sobrá di e salario i pa drenta akuerdo konhunto tokante esaki. Esaki ta yuda komprondé otro su posishon i tene na kuenta e interes komersial poné kontra kontinuidat di entrada di e empleado(nan). (Por lesa esaki den artíkulo 1614d, Burgerlijk Wetboek BES).
Mi mester keda paga mi primanan usual di dunadó di trabou?
Si.
Kiko mi mester hasi si un empleado pa kua mi ta risibí kompensashon bira malu òf tuma ferlòf di embaraso?
Bo no por hasi uso simultáneamente di e areglo di emergensia di SZW i e kompensashon pa pèrdida di salario pa e mesun empleado. Tuma kontakto ku nos pa mira kiko ta e mihó opshon den bo situashon. Por manda nos un meil via di NoodregelingSZW@RijksdienstCN.com òf por yama nos (Boneiru: 781 5555 òf 781 5556, Saba: 416 5652, Sint Eustatius: 790 0052).
Ki ora mi ta risibí e kompensashon?
Den kaso di asignashon e unidat SZW di RCN lo pagá bo e kompensashon mensualmente. E término legal pa e promé pago ta máksimalmente sinku siman. Unidat SZW di RCN ta aspirá pa paga bo mas lihé.
Kiko ta pasa si mi no paga e suma ku mi risibí di SZW na mi empleado(nan)?
Den e kaso ei bo ta kometé un krímen. Esaki tin konsekuensia penal.