Laga bisa, ku un petishon ta wòrdu hasí pa establesimentu di un sierto kompania – tuma por ehèmpel un tienda di souvenir – kaminda tin hopi kompania den e mesun sektor ei kaba ku kada un ta hasi muchu tiki benta pa yega na un entrada desente. E ora ei e dunadó di pèrmit mester por wanta e establesimentu di un mas kompania asina tòg?

Nò. E dunadó di pèrmit no mester bai sinta riba e stul di e empresario. E empresario ta esun ku ta kore riesgo: su sèn i su esfuerso ta bai pèrdí si kos no logra, i ta e mester lucha kontra e kompanianan eksistente ku naturalmente tin nan propio klientela kaba. Pero aparentemente e nobato ta mira oportunidatnan pa logra éksito. E por trese un mihó produkto por ehèmpel, e por ta apliká un mihó preis dor di traha mas efisiente, e por ta atraé klientenan ku un radiashon mas aktivo. Tur esei ta stimulá e kompanianan establesé pa no keda sinta, nan tambe lo mester hasi mas esfuerso pa tene nan kompania riba pia.