Pasa èksamen

Eksamen- i sertifikadonan pa operá ekiponan di radio marítimo

Si bo kier hasi uzo di un marifon òf otro ekiponan di transmishon marítimo, bo mester tin un sertifikado di operashon. Pa esei bo por pasa èksamen serka RDI. Pa esaki, hasi uzo di e formulario di registrashon.

Bo por pasa èksamen pa 3 tipo di sertifikado di operashon:

• E Sertifikado básiko di Marifonia ta e sertifikado mas simpel, destiná pa uzo di ekiponan di transmishon riba bénewater i den besindario inmediato di e islanan.
• E Sertifikado Komunikashon di Radio Marítimo (Marcom-B) ta destiná pa uzo di ekiponan di transmishon marítimo riba bénewater i den awanan di kosta.
• E Sertifikado General Komunikashon di Radio Marítimo (Marcom-A) ta e sertifikado mas amplio, destiná pa uzo di aparatonan transmisor marítimo riba laman òf oséano i riba bénewater.

Wak aki pa kua sertifikado, kua ekipo bo tin mag di usa. Bo tin un sertifikado Short Range of Long Range Certificate (Royal Yacht Association) esaki ya sufisiente den sierto situashon

Èksamennan pa amatùr di radio

Si bo kier bira amatùr di radio, bo mester pasa èksamen promé. E èksamen ta evaluá si bo sa sufisiente di e reglanan (internashonal) i kon pa operá ekiponan di radio di forma korekto. Bo uzo di frekuensia no mag interferí pues ku tráfiko di radio di por ehèmpel aviashon òf servisionan di asistensia. Ora bo slag, bo mester pidi un pèrmit serka RDI. Despues bo mag kuminsá transmití.

Ta un èksamen por eskrito, práktikamente igual na e èksamennan ku ta tene na Hulanda. E diferensianan ta den e serienan di nòmber di identifikashon i e bandanan di frekuensia ku ta usa.

Bo kier pasa èksamen pa amatùr? Tuma kontakto e ora ei ku RDI: BES@RDI.nl

Kambionan den èksamennan di radio

Den pasado, RDI tabata kompletamente responsabel pa e èksamennan di radio, pero for di promé di yüli 2024, a traspasá e tarea pa Hulanda Oropeo pa Ofisina Sentral pa Reibeweis (Centraal Bureau Rijvaardigheidsbewijzen - CBR) na Hulanda.  Komo ku CBR no tin ofisina na e islanan, RDI a keda ku responsabilidat pa e èksamennan pa Boneiru, Sint Eustatius, i Saba.

P’esei awor RDI ta risibí su èksamennan serka CBR. Asina RDI ta sigurá ku e eksámennan ta kumpli ku e mesun eksigensianan ku esunnan na Hulanda.

Den e èksamennan tin preguntanan tokante situashonnan spesífiko na Hulanda i Oropa, manera por ehèmpel tokante ‘binnenwater’. Esaki ta hasi e èksamennan na Boneiru, Sint Eustatius i Saba mas difísil pa algun hende. Pues pèrkurá pa bo ta bon prepará!

Entrante promé di òktober 2025, CBR a implementá vários kambio den e èksamen pa e sertifikado básiko di radio marítimo. E sertifikado aki ta obligatorio pa tur hende ku ke operá un radio marítimo abordo di un barku. Ku e struktura nobo, e èksamen ta mas alinea ku práktikanan aktual riba awa i e eksigensianan moderno pa usuarionan di radio marítimo.

Esaki ta e kambionan mas importante:

• Mas pregunta: E kantidat di pregunta di èksamen ta oumentá di 35 pa 40.
• Sistema nobo di puntuashon: Kada kontesta korekto ta skor 1 punto, e kantidat di punto lo kambia di un total di 60 pa 40 punto. Un kandidato ta slag si e tin 28 kontesta korekto.
• Tópikonan revisá: A desaroyá i aktualisá e tópikonan mas aleu pa reflehá e uso aktual di radio marítimo mihó. Esaki ta inkluí atenshon mas ekstenso na teknologianan digital, regulashonnan i seguridat marítimo.
• Evaluashon basá riba materia: E èksamen awor ta evaluá kada tópiko, pa asina sigurá ku e kandidatonan tin sufisiente konosementu di tur e komponentenan.

Kiko esaki ta nifiká pa bo komo kandidato?

E format nobo di èksamen ta rekerí un preparashon mas amplio i mas profundo. Kandidatonan mester tin konosementu aktual i ta bon vèrsá den tur faseta di uso di radio marítimo. Dominá e materianan básiko no ta sufisiente mas; situashonnan spesífiko, aplikashonnan digital, i regulashonnan tambe ta ser kubri.

RDI ta adaptando e programa di estudio di akuerdo ku esaki, pa bo por ta bon prepará pa traha e èksamen. 

E siguiente tambe ta konta:

• Durashon di èksamen: 60 minüt (ku e opshon pa pidi 15 minüt adishonal, por ehèmpel, den kaso di disleksia).
• Balides di resultado: Na Hulanda, e resultado optené ta bálido 5 aña pa apliká pa e sertifikado. Na Boneiru, Sint Eustatius i Saba, bo no mester apliká pa e sertifikado. Na Boneiru, bo por buska e sertifikado ku sita despues di risibí bo resultado. Si bo ta biba na Sint Eustatius òf Saba, bo ta risibí e sertifikado via pòst.
• Balides di e sertifikado: E sertifikado básiko ta bálido pa bida largu.

Por pasa e èksamen for di edat di 11 aña, pero e sertifikado lo ser otorgá te ora kumpli 16 aña. 

Bo ke sa mas? Wak e eksigensianan kompleto pa e èksamen riba e wèpsait di CBR: