Caribbean Science Institute
Sentro di konosementu ‘Caribbean Netherlands Science Institute’ (CNSI) na Sint Eustatius tin komo meta, ehekutá investigashon sientífiko relevante for di punto di bista sosial, promové interes lokal pa siensia i yuda fomentá konosementu. E sentro di konosementu su enfoke ta riba tópikonan relashoná ku sostenibilidat di komunidatnan isleño. Asina CNSI ta aportá na metanan di Nashonnan Uní pa desaroyo duradero (UN Sustainable Development Goals).
CNSI ta organisá regularmente tayer-, simposio- i aktividatnan edukativo pa e poblashon lokal. E ta fasilitá investigashon sientífiko ehekutá lokalmente pa medio di e fasilidatnan di: un laboratorio, akomodashon pa sientífikonan, un espasio pa duna presentashon i mas. E investigashon sientífiko ta wòrdu ehekutá pa medio di un kooperashon ku partner- i stakeholdernan manera universidat- i instansianan sientífiko den e área karibense, na Hulanda i den eksterior.
Ministerio di OCW (Onderwijs, Cultuur & Wetenschap) ta finansiá CNSI i NWO (Nederlandse Organisatie voor Wetenschappelijk Onderzoek) ta implement’e. El a ser fundá riba inisiativa di OCW i gobièrnu insular di Sint Eustatius. CNSI a habri su portanan ofishalmente riba 24 di aprel 2014.
CNSI tin apoyo di NIOZ (Koninklijk Nederlands Instituut voor onderzoek der Zee).
NIOZ ta forma parti di NWO.
Pa mas informashon tokante CNSI i e aktividatnan sientífiko: wak e link www.cnsi.nl.