Areglo di pago
Si bo no ta kapas di paga bo debe di estudio den un solo biaha por kompleto, e ora ei bo por pidi un areglo di pago. Bo ta paga un suma fiho bèk kada luna. Pa esaki un término di pago di máksimo 10 luna ta konta. E durashon di e término aki ta dependé di e nivel di bo debe di estudio total (eksklusivo interes). Wak pa esaki e tabèl aki abou.
E nivel di e suma mensual ku bo mester paga bèk, ta dependé di e nivel di bo debe di estudio total i e durashon di e término di pago.
Areglo di pago di debe di estudio:
|
Fiansa risibí den NAf |
Nivel di e debe di estudio den dòler (eks interes) |
Periodo di pago máksimo |
|
< NAf 5.000,- |
< $ 2.793,- |
2 aña |
|
< NAf 10.000,- |
< $ 5.586,- |
4 aña |
|
< NAf 30.000,- |
< $ 16.759,- |
6 aña |
|
< NAf 50.000,- |
< $ 27.932,- |
8 aña |
|
≥ NAf 50.000,- |
≥ $ 27.932,- |
10 aña |
Interes
Si bo ta paga bo debe di estudio via un areglo di pago, bo mester paga interes. E porsentahe di interes ta 10% pa aña. Mas largu e periodo di pago dura, mas interes bo ta paga finalmente.
Hasi petishon pa areglo di pago
Den e karta ku bo a risibí, RCN-Studiefinanciering ta hasi bo un proposishon pa un areglo di pago. Huntu ku e karta tin un formulario Hasi Petishon Areglo di pago Fiansa di FINEB. Ku e formulario ei bo por hasi e petishon pa un areglo di pago.
Paga èkstra
Bo a hasi un areglo di pago ku RCN-Studiefinanciering i bo ke paga mas ku e suma mensual stipulá? Esei ta naturalmente posibel. Bo por transferí kada luna stándart un suma mas haltu, pero bo por paga de bes en kuando un suma èkstra tambe. E bentaha di paga mas, ta ku di e forma ei, bo ta kaba paga bo debe mas promé. Finalmente bo ta paga ménos interes tambe.
Paga na tempu
RCN-Studiefinanciering mester a risibí e suma mensual pa mas tarda promé ku fin di kada luna. Pues sòru pa bo transferí e suma mensual na tempu. No e fecha riba kua bo transferí e suma mensual ta importante, pero e momento riba kua e sèn ta pará riba e kuenta di RCN-Studiefinanciering. Por tin algun dia di diferensia den esaki. Pues tene kuenta ku esei, ora bo ta hasi e pago.
Pa evitá ku bo ta paga muchu lat, nos ta rekomendá bo di sera un standing order/kobransa outomátiko serka bo banko. Tambe bo por transferí e suma via online banking, komo un transferensia periódiko.
Konsekuensianan di pagamentu muchu lat
Bo no ta paga e suma mensual, òf ta paga inkompleto òf muchu lat? E ora ei bo ta haña un rekordatorio pa pago (aanmaning) pa e suma habrí. Tambe bo ta kor e riesgo ku bo ta wòrdu kobrá gastunan atministrativo di $ 10,-. RCN-Studiefinanciering a bolbe keda sin risibí e suma promé ku e fecha di vensementu? E ora ei bo bòrg ta wòrdu demandá pa paga e suma habrí.
Si e bòrg tambe no paga e suma, paga e suma inkompleto òf paga muchu lat, e ora ei e suma ta wòrdu kobrá serka bo (i/òf serka bo bòrg) dor di un dùrwarder. E gastunan di kobransa, tantu hudisial komo no hudisial, i e gastunan di persekushon legal ta bai pa bo kuenta. Riba e suma habrí ta kobra interes legal. Ademas RCN-Studiefinanciering tin e derechi pa tèrminá e areglo di pago si bo no kumpli ku bo obligashon di pago (na tempu). E sobra di bo debe di estudio den e kaso ei, bo lo mester paga den un solo biaha. P’esei sòru pa paga semper na tempu.