Midishon di e forsa finansiero
Bo a pidi un areglo di pago i un ekstenshon di periodo di pago, pero e suma mensual te ainda ta muchu haltu? E ora ei bo por hasi un petishon pa un midishon di e forsa finansiero. Midishon di forsa finansiero ta enserá, ku na determinashon di loke bo mester paga mensual, ta tene kuenta ku bo entrada. Bo no por paga e suma mensual aktual, a base di bo entrada? E ora ei bo suma mensual ta wòrdu ahustá mas abou.
Entrada
Ora ta hasi e midishon di forsa finansiero ta wak solamente bo entrada, manera esei ta konosí serka Ofisina di Impuesto. Pues nos no ta wak e entrada di bo eventual pareha, irespekto e nivel di e entrada ei. No ta wak kua suma bo tin pa gasta. Pues no ta tene kuenta ku eventual otro debenan (di finansiamentu di estudio) ku bo ta pagando bèk òf gastunan èkstra ku bo tin di haber kuné.
Bòrg ta paga e diferensia
Si resultá ku bo por paga ménos ku e suma mensual, e ora ei e diferensia ta wòrdu kobrá serka bo bòrg ( den mayoria kaso esaki lo ta e mayornan). RCN-Studiefinanciering lo tuma kontakto ku bo bòrg den e kaso ei.
No un suma mensual mas haltu
Si resultá ku a base di bo entrada bo por paga mas ku e suma mensual? E ora ei esaki no tin konsekuensia pa bo. Bo suma mensual pues lo no wòrdu oumentá, pero tampoko lo wòrdu redusí.
Kalkulashon di forsa finansiero
E forsa finansiero ta wòrdu kalkulá a base di bo entrada den aña kalendario T-2. Di e entrada ei ta kita un base liber di forsa finansiero. Bo forsa finansiero anual ta 12% di e entrada ariba di e base liber di forsa finansiero (e base aki ta igual na 84% di e salario mínimo). Esaki dividí pa 12, ta e forsa finansiero pa luna kalendario.
Ehemplo:
A base di bo debe di estudio a determiná un suma mensual di $ 215,- pa bo. Pasobra bo no ta kapas di paga e suma aki, bo ta pidi un midishon di forsa finansiero. Bo ta hasi esaki den aña kalendario 2013 (T). Pa e kalkulashon di bo forsa finansiero, e ora ei nos punto di salida ta bo entrada den 2011 (T-2).
Segun Ofisina di Impuesto den 2011 bo tabatin un entrada di $ 25.000.-. Di esaki nos ta deskontá e base liber di forsa finansiero di $ 6.774,- (pa 2013). E diferensia ta $ 18.226,-.
Bo forsa finansiero a base anual ta 12% di e $ 18.226,- ei. Esei ta un suma di $ 2.187,12. Pa luna bo forsa finansiero pues ta $ 186,26 ($ 2.187,12/12). Esaki ta ménos ku e suma mensual di $ 215,- ku a wòrdu determiná. Bo suma mensual pues ta wòrdu redusí na $ 182,26. E diferensia ($ 32,74) ta wòrdu kobrá serka bo bòrg.
Fecha di inisio
RCN-Studiefinanciering ta kalkulá bo forsa finansiero for di e luna ku ta sigui bo petishon. Un petishon pa midishon di forsa finansiero ku forsa retroaktivo no ta wòrdu honrá. E kalkulashon di e suma mensual redusí ta bálido pa un aña kalendario. Si bo ke un midishon di forsa finansiero e aña siguiente atrobe, bo mester hasi un petishon nobo.
Hasi petishon pa midishon di forsa finansiero
Bo ke hasi un petishon pa midishon di forsa finansiero? Yena e formulario Hasi petishon pa midishon di forsa finansiero fiansa di FINEB 2022 kompletamente i mand’é aden ku e pruebanan ku ta wòrdu pidí.