Tokante FINEB
Fundashon Finansiamentu di Estudio di Bonaire (FINEB) a duna fiansa pa estudio den e añanan 2004 te ku 2010. E fiansa aki den boka di pueblo tabata wòrdu yamá Fiansa-FINEB, tambe. E fiansa –FINEB tabata wòrdu duná na studiantenan di Boneiru ku tabata bai studia na Boneiru, Kòrsou, Aruba òf na Hulanda.
RCN-Studiefinanciering (Finansiamentu di estudio-RCN)
Dor di e transishon estatal riba 10 di òktober 2010, Boneiru a bai pertenesé na Hulanda komo Entidat Públiko. Ku esei e tarea di e FINEB komo dunadó di finansiamentu di estudio a pasa pa e Ministerio di Enseñansa, Kultura i Siensia (OCW). E Ministro di OCW a deponé e tarea ehekutivo mas despues serka RCN-Studiefinanciering. RCN-Studiefinanciering ta ehekutá, na nòmber di e Ministerio di OCW, diferente lei i regulashonnan di enseñansa den Hulanda Karibense. Asina RCN-Studiefinanciering a duna finansiamentu di estudio den e periodo òktober 2010 te ougùstùs 2011, a base di e Wsf BES “bieu”. E lei aki ta (tabata-was) en realidat un ekstenshon di e Areglo Landsstudietoelagen i e FINEB-reglamentu.
Legislashon nobo
Pa 1 di ougùstùs 2011, e Wsf BES a drenta na vigor. Den e lei aki e Finansiamentu di estudio BES i e Supsidio pa start a wòrdu reglá. RCN-Studiefinanciering ta ehekutá e tareanan aki tambe. E kobramentu di fiansanan di FINEB tambe ta deponé serka RCN-Studiefinanciering (artíkulo 28 Lei finansiamentu di estudio BES manera e tabata konta riba 10 di òktober 2010 i artíkulo 9.2b di e Lei finansiamentu di estudio BES manera e tabata konta riba 1 di ougùstùs 2011). Riba 12 di mart 2013 e Estado di Hulanda, e Entidat Públiko i e Fundashon Finansiamentu di Estudio di Boneiru (FINEB) a firma un akuerdo pa kobransa di e fiansanan di FINEB.
Kobramentu di fiansanan
E fiansanan di FINEB ku a wòrdu otorgá ta wòrdu kobrá for di òktober 2013 dor di RCN-Studiefinanciering. Banda di esei e fiansanan ku a wòrdu otorgá den e aña di estudio 2010-2011 tambe ta wòrdu kobrá pa RCN-Studiefinanciering. Debedónan ku a haña un fiansa di FINEB promé ku 10 di òktober 2010 i ku a haña un fiansa di RCN-Studiefinanciering den e aña di estudio 2010-2011, mester paga tur dos fiansa bèk. E sumanan aki ta wòrdu kobrá komo un solo fiansa.
Ganashi pa Boneiru
E ganashi (ménos e gastunan di ehekushon) di e kobransa di e fiansanan di FINEB- inkluso e ganashi di interes ta wòrdu poné na disposishon di e Entidat Públiko Boneiru dor di e Ministerio di OCW i ta na bienestar di e enseñansa na Boneiru.