Den combersacionnan den e partinan Caribense di Reino tocante patrimonio y infrastructura museal tin atencion creciente pa e artefactonan cultural cu involuntariamente a entrega den e epoca colonial. E ministernan di e Consulta Ministerial di Cuatro Pais pa e motibo ey a dicidi pa lanta un grupo di trabou di coleccionnan procedente di e contexto colonial. Di e forma aki museo- y entidadnan di patrimonio den partinan Caribense di Reino ta haya mas influencia riba con ta anda cu e coleccionnan aki.
E aña benidero e grupo di trabou lo drenta den consulta cu museo- y otro instancianan envolvi. Hunto nan lo traha un plan pa colaboracion entre museonan y maneho di coleccion. Tambe nan lo haci palabracionnan tocante e proceso relaciona cu dunamento bek di coleccionnan colonial. E minsternan ta haya importante cu e plan aki ta conecta bon riba loke e islanan ya ta haciendo den cuadro di e efectonan di pasado di sclavitud.
Den e grupo di trabou aki cada isla, di tanto e paisnan autonomo, e municipionan particular como tambe Hulanda Europeo, lo keda representa. Cada isla ta nombra dos miembro: un representante oficial y un experto riba e tematica. Pa participa den e grupo di trabou, experticio riba tereno di coleccion colonial, colaboracion cultural of maneho di museo y coleccion tin preferencia. Na e momentonan aki e grupo di trabou ta den e proceso di formacion.
E grupo di trabou lo duna su conseho na e Consulta Ministerial di Cuatro Pais na november 2026.
Den preparacion pa e grupo di trabou, ministerio di Enseñansa, Cultura y Ciencia a encarga Arminda Franken cu e tarea pa haci un exploracion riba Aruba, Boneiro, Curaçao, Saba, Sint Eustatius y Sint Maarten. E obhetivo di e exploracion aki tabata pa primeramente provee comprendimento di e necesidadnan di organisacionnan activo den sector di herencia. Na di dos luga, haci un inventarisacion di coleccionnan y desafionan. Na di tres luga, duna recomendacionnan pa colaboracion interinsular y cu Hulanda Europeo.