Kalidat básiko pa kasi henter enseñansa na Hulanda Karibense
Durante e último bishita di inspekshon di enseñansa na Hulanda Karibense (C.N.) na mart 2018 atrobe algun skol i instituto edukashonal a optené e kalidat básiko. Di e 21 skol- i institutonan edukashonal na C.N. awor 20 di nan a logra e nivel di kalidat akí.
Pa Boneiru ta trata e biaha akí di e unidat di vmbo i mbo di Komunidat di Skolnan Boneriano (SGB) i Expertisecentrum Onderwijszorg (EOZ). Pa Sint Eustatius ta trata di e sekshon mbo-1 di Gwendoline van Putten School (GvP) i e trayekto di oportunidat sosial pa hóbennan, ku New Challenges Foundation ta ofresé. Esaki atrobe ta un logro importante den e trayekto di mehorashon di enseñansa na Hulanda Karibense.
Minister Arie Slob (Enseñansa) ta reakshoná kontentu: “Kasi tur instituto edukashonal na Hulanda Karibense a yega awor e nivel di kalidat básiko. E direktiva-, direktor-, maestro- i lidernan eskolar na Boneiru, Sint Eustatius i Saba di e forma ei a logra un prestashon fenomenal. Pa algun instituto esei tabata realmente un kaminda largu i hustamente esei ta hasié algu ekstraordinario. Mas i mas mucha ta haña e enseñansa ku nan tin derecho riba dje. E base tei awor. Laga nos huntu sigui traha riba un bon enseñansa.”
E direktornan di e institutonan en kuestion tambe ta kontentu i orguyoso. Direktor Rosa Hoes di EOZ Boneiru: “Ta fenomenal ku awor na Boneiru nos ta para huntu pa kalidat básiko, ban sigui traha awor riba perfekshon”. Direktor General Frans van Efferink di SGB ta partikularmente orguyoso di e dosentenan, ku a presta inkreibel komo tim”. Ademas e ta “enkantá ku awor nos ta demonstrá ku nos alumnonan por sigui studia masha bon na Boneiru, na un instituto di mbo ku kalidat básiko!”
Direktor Francine Foe di New Challenges Foundation i direktor Rosalie Edelstein-Lopes di GvP School ta pone énfasis riba e kooperashon entre e dos institutonan: “Nos a traha pa un meta i nos kier gradisí nos kolaboradónan pa nan esfuerso, embolbimentu, determinashon i nan aktitut proaktivo.”
Manera ta tradishon RCN/OCW a selebrá e bunita logro aki di forma festivo ku e skol-/institutonan edukashonal en kuestion.
Den e periodo di preparashon pa optené kalidat básiko, Inspekshon di enseñansa a bishitá e institutonan edukashonal na Hulanda Karibense dos bes pa aña. Intenshon di e bishitanan tabata pa vigilá progreso di e proseso di drechamentu di kalidat pa eliminá retrasonan den e desaroyo. A redusí e frekuensia di e bishitanan na un biaha pa aña, despues ku un instituto edukashonal a logra e kalidat básiko.
E metanan pa e kalidat ku ta aspirá pa enseñansa ta ankrá den e Agènda edukashonal Hulanda Karibense. Na e momentunan akí e partidonan den enseñansa ta traha pa realisá e metanan den e di dos Agènda edukashonal. E Agènda edukashonal akí ta titulá “Traha huntu riba e siguiente paso” i ta trata e periodo 2017 te ku mei 2020.