Treinen pa maneho di skol Hulanda Karibense
Konseho pa Enseñansa Primario, (Primair Onderwijs-Raad) ku ta representá interes konhunto di direktiva di skol na parti oropeo i karibense di Hulanda, a asosiá ku Training Professionals International Firm, TPI. Meta di e asosiashon akí ta pa ‘coach’ kabes di skol i kabes di skol athunto i potensial miembro di tim di maneho na Sint Eustatius i Saba.
Na aña 2011, Konseho pa Enseñansa Primario, a petishon di Ministerio di Edukashon, Kultura i Siensia na Den Haag a kuminsá ku e proyekto ‘Coach na Hulanda Karibense.’ Den e proyekto tantu ‘coach’ di skol komo ‘coach’ di direktiva ta sostené desaroyo di organisashon di skol karibense manera esaki ta formulá den Agènda di Edukashon pa Hulanda Karibense. Meta di Agènda di Edukashon ta pa alsa kalidat di enseñansa na Hulanda Karibense na e mes nivel di Hulanda Oropeo.
Treinen den dos parti
TPI su ròl ta konsistí di dos parti den e proyekto di treinen di maneho di skol i lo otorgá tur partisipante dos sertifikado ku ta akreditá rònt mundu, esta ‘Management & Leadership’ i ‘Coaching for High Performance’. E promé ròl di TPI ta pa duna ‘coaching’ profeshonal riba un base individual na kabes di skol kaminda ta enfoká riba e mihó ehèmpelnan di siglo 21 den maneho di skol i liderazgo, téknika pa mehorá envolvimentu di dosente, práktika pa oumentá envolvimentu di mayor, konosementu tokante kon mehorá standart di responsabilisá staf i enfoke pa krea tim di trabou ku ta funshoná na nivel haltu.
E di dos parti di e programa ta konsistí di guia seshon di grupo ku kabes di skol i kabes di skol athunto i ku potensial miembro di tim di maneho. E seshonnan den grupo lo enfoká riba mehorá funshon i proseso di skol, komunikashon efikas, aktividat ku ta stimulá edukashon positivo, relashon entre mayor i studiante, maneho di tempu, téknika pa fiha prioridat, i kon implementá un programa pa ‘coaching’ di dosente den nan organisashon.
Dr. Gittens, konsultadó edukashonal seniòr, ta dirigí e proyekto, ta deklará : “TPI ta komprondé ku ta di vital importansia pa tur profeshonal sigui siña kontinuamente (‘continuous learning’). Nos tim i ami ta masha kontentu ku T.E.A.C.H. Institute, divishon edukashonal di TPI, por ta envolví den un programa ku lo marka un diferensia grandi den e forma di aktua di edukadó, lo por midi esaki.”
Partisipantenan tokante e programa
Sigun Anton Hermans, kabes di skol di Saba Comprehensive School, (SCS): “Desaroyo profeshonal kontinuo ta importante pa tur miembro di nos tim. Ta p’esei maneho di SCS ta mira e chèns pa desaroyo profeshonal komo un forma positivo pa mehorá nos abilidat i mehorá nos karera.”
Camelia Berkel, direktor di The Expertise Centre Education Care, (ECE) di Sint Eustatius ta kompartí : “E treinen kontinuo di nos tim di mènedjer ta esensial, ya ku nan ta esnan ku lo establesé e tono pa ambiente na skol pa dosente i alumno.”
Rhea Courtar, dosente i kabes di skol athunto di Golden Rock Primary School di Sint Eustatius ta kompartí : “E programa akí ta importante pasobra e ta duna edukadó chèns pa krese komo individuo i komo grupo. E lo stimulá nos pa kompartí i risibí idea inovativo ku lo benefisiá nos skol i nos komunidat mesora.”