Sigiente reunion tokante manual pa personal den enseñansa Hulanda Karibense
Den e di dos parti di febrüari di e aña aki a presentá den konsepto e di dos vershon di un manual pa personal pa skolnan di Hulanda Karibense. Pa e motibu aki empleadonan di OCW di Hulanda Karibense i di e parti Europeo di Hulanda a bishitá skolnan i sindikatonan. E manual di personal ta deskribí e kondishonnan laboral pa personal den enseñansa na Hulanda Karibense.
E posishon legal di personal den enseñansa ta un materia basta kompliká. E kondishonnan laboral ta determiná den vários areglo. E manual mes no ta un areglo legal. E ta duna solamente splikashon di e derecho i obligashonnan manera esakinan ta stipulá den lei i reglanan, manera informashon tokante rekompensashon, gratifikashon i tipo di dianan liber. Tin un resúmen di e areglonan mas importante den e suplemento di e manual. E areglonan aki ta públiko i aksesibel pa tur hende riba Internet (wetten.overheid.nl).
E manual di personal ta pa personal den enseñansa na Boneiru, Sint Eustatius i Saba ku ta den servisio di un skol públiko òf enseñansa speshal ku gobièrnu di Reino ta finansiá. Ku personal di enseñansa ta referí na direktor, direktor suplente, dosentenan i e personal di apoyo den enseñansa. E manual no ta duna informashon detayá riba aplikashon di kondishonnan laboral riba situashonnan spesífiko. Semper lo tin pregunta tokante aplikashon di e areglo den situashonnan spesial. Por dirigí preguntanan adishonal na RCN/OCW via di koreo elektróniko: vragenoveronderwijs@rijksdienstcn.com.
Na yüni di 2017 a papia tokante e promé vershon di e manual pa personal ku e mes un grupo aki. Despues di esaki a adaptá e teksto di e manual. Asina a yega na e di dos konsepto ku a papia riba dje resientemente.
E realisashon di e manual di personal ta un di e akshonnan for di e agènda di enseñansa pa Hulanda Karibense di 2017 te ku 2020. Den e agènda di enseñansa tin akshonnan ku ta enfoká riba kontinuashon di mehorashon den enseñansa. Den esaki tin atenshon tambe pa algun kondishon, manera riba tereno di kondishonnan laboral.Meta di e manual aki ta splika di forma kla kua kondishon laboral ta aplikabel pa personal den enseñansa i pa yuda ku ehekushon korekto di akuerdonan di kondishonnan di empleo. A yega na e akuerdonan aki den e asina yamá ‘Op Overeenstemming Gericht Overleg’ (OOGO). Esaki ta un konsulta entre direktivanan di skol, sindikatonan i gobernantenan di isla.
Deskripshon di foto
E reunion tokante e manual di personal na Boneiru ku direktiva di skolnan i bestür.Na palabra konsehero di maneho Helma van Schie di e departamento di kondishonnan laboral di e Ministerio di OCW.
Mas informashon
Pa mas informashon tokante e manual di personal òf e kondishonnan laboral na Hulanda Karibense por tuma kontakto ku maritsa.silberie@rijksdienstcn.com òf via telefòn na +599 715 8319.