A firma akuerdo di kondishonnan laboral pa personal den enseñansa na Karibe Hulandes 2018 – 2020

Notisia | 25-09-2018 | 15:56

E akuerdo aki ta enserá:

• Un oumento di salario den dos aña di en total 3,75%: 2% oumento di e salario bruto entrante promé di yanüari 2018 i un oumento di e salario bruto di 1,75% entrante promé di yanüari 2019;
• Sigui traha pa e kompensashon di fin di aña bira un di 13 luna. Esaki lo keda introdusí den fase i ta kuminsá promé di yanüari 2018:
  - Entrante promé di yanüari 2018 lo remplasá e kompensashon di fin di aña ku 5 porshento di e salario bruto, ku un mínimo di 1500 dòler;
  - Entrante promé di yanüari 2019 lo remplasá e kompensashon di fin di aña ku 6 porshento di e salario bruto, ku un mínimo di 1500 dollar;
  - Entrante promé di yanüari 2020 lo remplasá e kompensashon di fin di aña ku 7 porshento di e salario bruto, ku un mínimo di 1500 dollar.
  Pa final di 2019 lo stipulá si tin espasio pa desaroyo di salario. Lo diskutí esaki ku e sindikatonan i e dunadó di trabou. E punto di salida ta ku e espasio lo keda primeramente den 2020 òf e añanan despues, pa logra e kompensashon di fin di aña na 8,33%.

Otro palabrashonnan:

• E momentu di paga e kompensashon di fakansi i di fin di aña:
  Den e konsulta di sektor dia 24 di yanüari 2017 a disidí ku lo paga e kompensashon di fakansi den luna di mei i e kompensashon di fin di aña den luna di novèmber.
• Kontribushon adishonal den e akuerdo laboral pa enseñansa primario:
  Enseñansa primario a traha hopi duru den e último añanan pa drecha e kalidat di enseñansa. E maestronan di enseñansa primario ta repartí prinsipalmente den e skal salarial LA i parsialmente den LB. Lo uza e medionan disponibel pa un oumento adishonal struktural di 3% pa tur hende den skal LA entrante yanüari 2018. E salarionan di skalnan LB i LC lo no konosé un oumento adishonal. Na lugá di esaki e direktivanan di skol lo por uza e medionan finansiero ku sobra, konforme e espasio, pa duna un oumento adishonal periódiko na maestronan den skal LB i / òf pa por promové maestronan di skal LA pa LB òf LB pa LC. Uzando e medionan di e forma aki e posishon salarial di e maestronan ku tin e salarionan mas abou lo keda reforsá.
• Medionan adishonal pa baha e preshon di trabou den enseñansa primario:
  Dia 9 di febrüari 2018 e sindikatonan, e Konseho pa Enseñansa Primario (PO-raad) i gabinete hulandes a yega na un akuerdo. Pa e akuerdo aki a pone medionan finansiero adishonal disponibel. Kada skol lo disidí kon lo uza e medionan akí, pa por baha e preshon di trabou. Den e akuerdo a pone énfasis riba embolbimentu di e maestronan. P’esei mes lo konsultá e desishon riba e uzo di e medionan disponibel, ku representantenan di e personal den e Konseho di Partisipashon (MR) di e skol. Finalmente ta e direktiva di skol ta responsabel pa uzo di e medionan adishonal akí.

Ademas lo bai tene un sondeo pa logra na un mihó sistema pa yega na akuerdonan laboral pa e personal den enseñansa. E promé kombersashonnan ya a tuma lugá ku e sindikato, konsehonan di partisipashon, maestronan, direktivanan di skol i e entidatnan públiko. Den luna di òktober lo tin un konferensia pa informá i konsultá esnan konserní tokante posibel mehorashonnan di e proseso aktual di formashon di kondishonnan laboral kolektivo. E akuerdo di kondishonnan laboral akí, ku tin un término di tres aña, ta duna espasio pa konhuntamente yega na un mehor modelo di konsulta.