Direktornan i direktivanan Enseñansa na Den Haag
E siman tras di lomba direktor- i miembronan di direktiva di institutonan di enseñansa di Hulanda Karibense a bishitá den Haag. Meta di e bishita aki tabata pa papia ku diferente funshonarionan di maneho tokante di mehorashon di kalidat di enseñansa riba e islanan. Minister Arie Slob di OCW tambe a join un ratu.
Eveliene Coenen, èks direktor di Stichting Openbaar Onderwijs Bonaire, ta mira atras ku satisfakshon: E kombersashon a tuma lugá den kuadro di e di dos Agènda di Enseñansa Hulanda Karibense 2017-2020, i e pasonan ku ainda mester den esaki. Segun Eveliene, “e promé Agènda di Enseñansa for di 2011 tabata ambisioso. Pero nos a logra. Nos timnan, empleado di skolnan, a traha hopi duru e añanan ku a pasa, i a pone man na obra pa e trabou aki i inisiá e desaroyo pa realisá e metanan, i esei nos a logra! I awor pa e di dos agènda tambe, tur hende ta pará kla i tur hende ta aseptá e desaroyonan dor di dediká nan mes por kompleto tur dia di nobo.”
Segun Eveliene Coenen e Agènda di Enseñansa tabata un bon rekurso pa inisiá e desaroyonan. “Otro ministerionan por tuma un ehèmpel di esaki. Es desir e ta krea klaridat pa tur partidonan. Mi ta orguyoso di e esfuersonan di e personal di edukashon na Hulanda karibense ku a sa di duna di nan banda pa ehekutá e promé Agènda di Enseñansa den korto tempu.”
Djamars e dirigente- i lidernan di skol a papia den gruponan chikitu ku koleganan di maneho di OCW tokante di temanan ku ta biba fuertemente den e di dos agènda di edukashon i mehorashon di e kalidat ku ta pará sentral den dje: e kuríkulo, prueba i supervishon, yudansa den edukashon, kapasitashon, rekrutamentu i selekshon i rekapasitá e personal, transferensia i afiliashon na merkado laboral, i e introdukshon di e sistema di Caribbean Examination Council na Sint Eustatius i Saba. Empleado di maneho Jeroen Arts di OCW den Haag: “E kombersashonnan a demonstrá nos koleganan di maneho kiko konkretamente ta pasando den nan área di trabou, kua ta e opstákulonan. Pa algun di nan esaki tabata hopi informashon nobo. Awor mester wak kiko loke nan a tende ta nifiká pa e maneho ku nan ta traha.
E delegashon di Hulanda karibense siman pasá tabata di bishita na e Konseho di PO (PO-Raad) pa un siman kompletu di bishita na skolnan, diferente master class i tayernan. A sera e bishita djabièrnè ku partisipashon na e kongreso anual di e Konseho di PO (PO-Raad).
E Konseho di PO (PO-Raad) ta e organisashon di sektor pa skol primario (Primair Onderwijs, PO). E asosiashon ta atendé ku e interesnan komun di e hunta di skolnan den edukashon primario, edukashon primario spesial i edukashon (sekundario) spesial.