Promé èksamennan di CXC na Sint Eustatius
Siman pasá a tene e promé èksamennan na ingles di Caribbean Examination Council (CXC) na Gwendoline van Putten School (GvP) na Sint Eustatius. Tabata trata di èksamennan pa finalisá ‘onderbouw’, e klasnan mas abou di skol sekundario. Desde ku a introdusí e sistema eskolar CXC, onderbouw ta konsistí di tres aña eskolar. E onderbouw su nòmber ta CCSLC (Caribbean Certificate of Secondary Level Competence).
Den e ‘onderbouw’ yamá CCSLC tur alumnonan ta sinta huntu. Despues di finalisá CCSLC e alumnonan ta sigui den sea e direkshon akadémiko (komparabel ku e ruta edukativo teóriko di mbo òf havo) òf den enseñansa di profeshon (komparabel ku mbo). Den e sistema di CXC e direkshon akadémiko ta yamá CSEC. Esaki ta para pa Caribbean Secondary Education Certificate. E direkshon di enseñansa di profeshon yama CVQ. CVQ ta e abreviashon di Caribbean Vocational Qualification. Ámbos direkshon ta dura dos aña. Alumnonan ku kier bai universidat, por sigui despues di CSEC, e direkshon CAPE di dos aña. CAPE ta pará pa Caribbean Advanced Proficiency Examination.
En prinsipio ta traha e èksamennan di CXC online. Pero pa siguridat tin e èksamennan tambe riba papel. E organisashon di CXC ta manda e èksamennan riba papel bon sigurá pa e ‘local Registrar’. E persona akí mester ta establesé lokal i mester ta un representante di Ministerio di enseñansa. Den e kaso di Sint Eustatius esaki ta un di e kolaboradónan di maneho ku ta trahando na e departamento di OCW di Rijksdienst Caribisch Nederland.
E alumnonan ku pasa e èksamen di CCSLC pa onderbouw awor, ta e proménan ku lo pasa pa e direkshonnan di CSEC i CVQ. Na Saba ta usando e sistema di CSEC ya pa kasi dos dékada kaba. Pero aya, meskos ku na Sint Eustatius, ta introdusí e sistema di CVQ pa di promé bes den e aña eskolar nobo.
E kambio pa e sistema di CXC ta konsekuensia di e transishon pa ingles komo idioma di instrukshon den enseñansa na Sint Eustatius. Komo ku e sistema eskolar hulandes ta kompletamente na idioma hulandes, mester a buska un sistema eskolar na ingles. Despues di un investigashon profundo e sistema di CXC a sali komo e mihó opshon. E ta rekonosé rònt mundu. Alumnonan ku finalisá nan estudio di CXC na Gwendoline van Putten School i na Saba Comprehensive School (Saba), por sigui studia tantu den e region karibense komo na Hulanda, Merka, Canada i Australia.