Bishita di DUO na Boneiru kanselá
E bishita na Boneiru ku Dienst Uitvoering Onderwijs (DUO) tabatin planiá no ta sigui pa motibu di e medidanan di corona mas severo pa e isla. Pa por duna servisio tòg na personanan, DUO ta ofresé webinar- i kombersashonnan di video online komo alternativa.
Di 29 di novèmber te ku 10 di desèmber DUO lo a habri un ofisina di servisio temporal na Boneiru pa papia ku futuro i eks studiantenan. Ademas tabatin enkuentronan di informashon pa futuro studiantenan riba programa. Tambe a invitá personanan ku problema di pago pa un kombersashon pa un areglo di pago na midí. Pa tur aktividat DUO ta ofresé un alternativa online.
Informashon pa medio di webinar
Monique Hoogerwerf, kordinadó di e area Karibense na DUO: “Nos ta lamentá hopi ku e bishitá planiá na Boneiru no por sigui. Danki Dios nos por yuda nos klientenan bon online tambe. Na komienso di e luna aki nos a tene webinar pa futuro studiante i pa personanan ku mester paga bèk. Por bolbe wak e webinarnan aki via e archivo riba duo.nl/webinar.”
Kontakto personal
“Pa personanan ku tin pregunta nos tim karibense ta digitalmente kla pará pa yuda”, segun Hoogerwerf. “Tur hende ku ta deseá esei por chat riba duo.nl/antillen ku un kolaboradó òf traha un sita pa un kombersashon di video personal. Asina por ehèmpel nos por yuda bo ku preguntanan tokante petishon pa finansiamentu di estudio, pagamentu bèk lokal òf un midimentu di kapasidat finansiero.”
DUO ta yuda
Kontakto personal ku DUO, ta yuda prevení problema. Hoogerwerf: “Nos ta ripará ku kontakto personal ku un kolaboradó di DUO por ta un solushon pa personanan ku ya pa algun tempu kaba ta lidiando ku un debe ku nan no por paga bèk mas. Den un kombersashon personal nos por buska un solushon na midí. Drenta den kontakto ku nos digitalmente. Nos por yuda bo!.”
DUO ta ehekutá entre otro lei i reglamentonan riba tereno di finansiamentu di institutonan edukativo, dunamentu di finansiamentu di estudio i kompensashon pa gastunan eskolar, kobransa di debenan di estudio i maneho i interkambio di datonan mará na e number di edukashon.