Promé rapòrt di inspekshon tokante kalidat di akohida di mucha na Hulanda Karibense
Riba djamars 4 di aprel Inspekshon di Enseñansa a publiká un rapòrt relashoná tokante e promé midimentu di kalidat di akohida di mucha na Hulanda Karibense. Na 2021 i 2022 Inspekshon a bishitá tur organisashon di akohida di mucha na Boneiru, Saba i Sint Eustatius. E promé tanda di inspekshon ta mustra ku mester sigui drecha kalidat di akohida di mucha. Tambe ta konstatá ku tur esnan embolbí ta hasi hopi esfuerso pa logra esaki den e añanan benidero, pero ku esaki ta eksigí hopi tempu i rekurso.
Inspekshon di Enseñansa (despues: inspekshon), den kooperashon ku inspektornan lokal riba e tres islanan, a bishitá 68 sitio pa akohida di mucha, akohida despues di skol i akohida di gastouder, na 2021 i 2022. E meta tabata pa hasi un asina yamá ‘0-meting’ basá riba e eksigensianan di kalidat stipulá na 2020 den ordenansanan insular i dentro di poko den lei tambe. E rapòrt ta duna un bon bista, a base di kua por sigui traha ku e programa Bes(t) 4 kids riba mehorashon di kalidat i aksesibilidat.
Minister Carola Schouten, tambe na nòmber di minister Dennis Wiersma di OCW, a manda e rapòrt i su reakshon pa Tweede Kamer. Relashoná ku e rapòrt e ta bisa:
“E organisashonnan di akohida di mucha ta trahando ful swing pa mehorá kalidat. E rapòrt akí ta mustra e promé mehorashonnan. Mi tin konfiansa ku e esfuersonan di e organisashonnan, huntu ku e medidanan di sosten adishonal i prolongashon di e programa BEST(t) 4 kids te ku 2028, lo bai kondusí na mas kalidat.”
Opservashonnan
Inspekshon ta positivo riba e echo ku hopi profeshonal ya ta siguiendo un estudio mbo i ku ta logra pa tin karanan permanente pa e gruponan, no opstante e reto pa haña i mantené sufisiente personal. Tambe inspekshon ta positivo tokante nutrishon saludabel diario, e kontakto ku mayornan i aktitut pedagógiko di profeshonalnan. Na mayoria sitio nan ta anda di forma sensitivo i ta reakshoná adekuá riba e muchanan. Nan ta pone límitenan i ta brinda struktura. Un opservashon importante di inspekshon ta ku serka tur esnan embolbí por mira entusiasmo i esfuerso pa sigui alsa kalidat di akohida di mucha.
Un punto di atenshon ta por ehèmpel asuntu di stimulá i monitòr desaroyo di muchanan na un manera lúdiko. Tantu e diversidat na wega ku ta ofresé komo aktitut edukativo di profeshonalnan por mihó na hopi sitio. Tambe tin un reto grandi riba tereno di alohamentu, ku ta pone ku na hopi sitio muchanan tin tiki espasio pa hunga. Ademas hopi bia no tin un plan di maneho pedagógiko i maneho enfoká i strukturá pa mehorá kalidat serka hopi organisashon ainda ta den un fase inisial. Esaki ta eksigí hopi esfuerso ainda e añanan benidero.
Na hopi sitio maneho di siguridat i salubridat tampoko no tabata kumpli ku tur eksigensia. Asina por ehèmpel no (tur) Deklarashon Tokante Kondukta di miembronan di personal tabata presente òf vigente i no tur ora tabatin un adulto presente ku a sigui e entrenamentu (ku mester ripití anualmente) pa duna promé asistensia na mucha. Inspekshon a duna un periodo di korekshon kòrtiku pa e partinan akí i minister tambe a duna di konosé kon importante e ta haña pa tin esaki na òrdu mas pronto posibel.
Kontinuashon
Relashoná ku e promé tanda di inspekshon tur organisashon di akohida di mucha a risibí un rapòrt di konseho ku puntonan ku ta kana bon i esnan ku mester drecha. Pa logra esei nan ta haña sosten di e programa BES(t) 4 kids. Awor ku a finalisá e promé inventarisashon di e situashon, e supervishon regular ta drenta na vigor tambe. Inspekshon ta bishitá anualmente tur organisashon di akohida di mucha pa hasi kontrol di kalidat.
Por haña e rapòrt di inspekshon kompleto i un resúmen di tur dato relevante riba e wèpsait di Inspekshon di Enseñansa. Aki por lesa e reakshon di maneho di minister Schouten.