Proposishon di lei pa akohida di mucha bon, seif i pagabel

Na djaweps 16 di febrüari e proposishon di lei pa akohida di mucha ta ofresé na e Tweede Kamer. Den e proposishon di lei aki e reglanan básiko ta ankrá pa e kalidat, supervishon i finansiamentu di akohida di mucha na na Boneiru, Saba i Sint Eustatius. E meta ta pa ofresé bon akohida di mucha, seif i pagabel pa tur mucha na Hulanda Karibense, di manera ku kada mucha tin e oportunidat pa desaroyá su mes plenamente.

BES(t) 4 kids

E eksigensianan di kalidat den e proposishon di lei ta kuadra pa gran parti kaba ku e eksigensianan ku ya kaba ta na vigor pa medio di e Ordenansa(nan) Insular Akohida di Mucha. Ta trata di por ehèmpel eksigensianan pa aktuashon pedagógiko, siguridat di mucha i maneho di salú. Ku e programa BES(t) 4 kids, hopi organisashon di akohida di mucha ya ta hopi leu kaba kumpliendo ku e eksigensianan di kalidat akí.

E proposishon di lei ta kontené tambe eksigensianan di kalidat pa pèrkurá ku e transishon di akohida di mucha pa skol básiko ta kana sin problema i pa prevení retraso den desaroyo i siñamentu. Pa esei mester traha ku un programa pa edukashon preeskolar i mester monitòr desaroyo di mucha den akohida di mucha. Tambe akohida di mucha i skol mester hasi palabrashon ku otro tokante kon ta organisá e transishon. Intenshon ta pa skolnan básiko ofresé un programa di edukashon infantil den grupo 1 i 2 ku ta konektá riba e programa di akohida di mucha.

Ta duna akohida na muchanan ku tin mester di èkstra sosten, mas tantu posibel den gruponan regular. Pa sostené organisashonnan di akohida di mucha den kaso di muchanan ku problemanan menor, entidat públiko ta sòru pa sosten i konseho pedagógiko. Den kaso di problemanan mas pisá por hasi uso aweró di Expertisecentrum Onderwijszorg (EOZ) pa konseho tokante e plan di guia i si ta nesesario (laga) hasi diagnóstiko, guia e mucha pa kuido spesialisá òf pa plusopvang. Plusopvang ta un akohida speshal pa mucha ku tin nesesidat di apoyo adishonal, kaminda por ehèmpel e espasionan ta adaptá i kaminda tin kolaboradónan pedagógiko ta traha ku a sigui entrenamentu adishonal.

Supervishon

Basá riba e proposishon di lei, lo apuntá Inspekshon di Enseñansa komo supervisor di kalidat di akohida di mucha. Na momentu di hasi supervishon, inspekshon ta traha huntu ku inspektornan lokal di entidat públiko i lo apliká, sigur den e promé añanan, supervishon ku ta duna estímulo. Esei ta nifiká ku e supervishon ta dirigí riba mehorashon di kalidat di akohida di mucha.

Finansiamentu

Segun e proposishon di lei Gobièrnu Sentral pa gran parti ta bai finansiá akohida di mucha. Den 2023 lo kontinuá ku un investigashon di e gastunan di akohida di mucha. A base di e resultadonan di e investigashon akí lo stipulá e montante di e kompensashon pa akohida di mucha i e kontribushon di mayor.

E kontribushon di mayor ta sigui baha te na 4% di e preis di kosto, na momentu ku esaki drenta na vigor pa Hulanda Oropeo tambe. Aweró E gastunan pa akohida di mucha ku mayornan mester keda paga na akohida di mucha lo no kosta mas ku algun desena di dòler pa un luna di akohida. Pa mayornan ku no por paga esei, entidat públiko ta haña oportunidat pa paga e kontribushon di mayor. E akohida di mucha ta grátis pa nan.

Kon ta sigui

Promé ku e proposishon di lei bira definitivo, ta present’é na Tweede i Eerste Kamer i na Rei pa ser firmá. E lei lo drenta na vigor den fase. Ta ferwagt ku den 2024 e partinan relashoná ku kalidat i supervishon lo drenta na vigor. E parti ku tin di aber ku finansiamentu lo sigui mas despues.

Banda di esei ta trahando pa sigui konbertí e proposishon di lei den un Medida General di Gobièrnu (Algemene Maatregel van Bestuur (AMvB). Akiden ta inkorporá eksigensianan mas spesífiko pa sierto partinan ku tin di aber ku kalidat i supervishon. Den e promé mitar di 2023 lo tene un tanda di konsulta riba tur e tres islanan, ku entre otro organisashonnan di akohida di mucha, skol i mayornan.

Riba e wèpsait www.best4kids.nu (primi riba ‘Regulashon Legal’) tin un resúmen di e proposishon di lei i un pelíkula di animashon.

B4K