Koperashon mas estrecho entre e parti karibense di Reino i Hulanda riba tereno di enseñansa i investigashon
Diesocho instituto di enseñansa i konosementu di e parti karibense di Reino i Hulanda ta bai sigui strukturá i intensivá nan koperashon riba tereno di enseñansa, investigashon i siensia. Asina por ehèmpel nan kier bai desaroyá entre otro programanan di enseñansa konhuntamente. E kolaborashon speshal ta resultado di e mishon di konosementu den e área karibense bou di liderazgo di minister Dijkgraaf (Enseñansa, Kultura i Siensia). Djabièrnè último a klousurá esei na Kòrsou.
Minister Dijkgraaf (Hulanda):
"Huntu ku mi koleganan minister di e otro tres paisnan di Reino e último añanan nos a traha duru riba mas koperashon den Reino. Ku éksito. Wak por ehèmpel e Beka di Reino pa interkambio di durashon kòrtiku di studiante. Awor nos ta bai pa e siguiente fase. Mi ta sumamente kontentu ku e inisiativa akí di e institutonan di konosementu. Awor por pasa e batuta di e forma maravioso akí.”
Minister Van Heydoorn (Enseñansa, Siensia, Kultura i Deporte, Kòrsou):
“Studiantenan di e paisnan karibense den e fase akí ta pará mas sentral ainda ku ántes. Esei ta importante pa mi. Traha huntu riba éksitonan di estudio palabrá ku otro, ta traha huntu tambe riba desaroyo personal korekto di e hóbennan akí. E institutonan di konosementu konhunto lo inkluí e aspekto di formashon akí eksplísitamente den nan programanan nobo. P’esei e inisiativanan di e institutonan di konosementu por keda konta riba mi pleno apoyo, pasobra e paisnan karibense ta benefisiá di profeshonalnan hóben bon pará den bida.“
Programanan edukativo
E institutonan ta ofresé e arsenal kompleto na enseñansa superior: mbo, hbo i wo, den e kaso akí komplementá ku siensia. Nan kier bai traha huntu pa entre otro konhuntamente desaroyá programanan edukativo. Pensa por ehèmpel riba un estudio di dosente. Ta bai tambe pa interkambio di studiante (ku ayudo di Beka di Reino), investigashon práktiko òf akadémiko konhunto i pa kompartí informashon i rekursonan edukativo ku otro. Pa loke ta trata e inisiativanan ta trata tambe di e impakto di pasado di sklabitut den enseñansa di awendia.
Konsulta
Den un deklarashon di intenshon a palabrá ku ta bin un konsulta atministrativo ku ta bai formulá un agènda di trabou. Den esei ta inkluí tambe studiante- i partidonan di merkado laboral. Den kurso di e aña akí mester desaroyá e aktividat- i formanan di koperashon.
Institutonan individual naturalmente tambe por disidí di bai traha huntu. Asina por ehèmpel durante di e mishon di konosementu e universidatnan di Aruba, Kòrsou, Haagse Hogeschool i Universidat di Utrecht a haña otro den e ambishon pa start un estudio partaim di atministrashon públiko. Esei lo mester fortalesé e poder atministrativo riba e islanan.
E partidonan embolbí ta di Aruba EPI, Universidat di Aruba i IPA, di Hulanda Karibense SGB Bonaire, di Kòrsou Nilda Pinto SBO i Universidat di Kòrsou Dr. Moises da Costa Gomez i di Sint Maarten University of St. Martin i NIPA.
Di Hulanda Oropeo ta trata di ROC Amsterdam, ROC Zadkine, Aeres, De Haagse Hogeschool, Fontys Hogeschool, NHL Stenden, Unversidat di Utrecht, Universidat di Maastricht, KNAW en NWO.