Studiantenan karibense ta bai Hulanda mihó prepará
Di 10 di mart te ku 11 di aprel 2025, Dienst Uitvoering Onderwijs (DUO) ta hasi un bishita di trabou na e área karibense. Durante e bishita lo habri ofisinanan di servisio temporal. Tambe DUO ta organisá enkuentronan di informashon tokante finansiamentu di estudio. Durante esakinan ta pone atenshon tambe na kon studiante, ku e number di servisio pa siudadano (burgerservicenummer (BSN)) ku el a risibí, por prepará su mes mas mihó riba su estudio na Hulanda.
Ora studiantenan pidi finansiamentu di estudio, outomátikamente nan ta risibí un BSN tambe, entrante promé di aprel 2024. Ku esaki, promé ku nan biaha pa Hulanda, studiantenan por kuminsá regla un DigiD, ku kua nan por drenta den wèpsaitnan di gobièrnu hulandes. Asina studiantenan por kuminsá tira bista entre otro riba montante di nan finansiamentu di estudio. Tambe nan por kuminsá traha sita na algun munisipio pa inskripshon den e munisipio kaminda nan ta bai biba. Ademas ta posibel tambe pa habri un kuenta di banko ‘online’ serka algun banko. ‘Nos a ripará ku desde ku studiantenan karibense ta risibiendo un BSN, nan ta biniendo Hulanda mihó prepará’, segun Monique Hoogerwerf, kordinadó di área karibense na DUO. ‘Ta dushi pa mira ku pa e motibu akí nan por kuminsá mas mihó.’
Enkuentronan di informashon
DUO, di 10 di mart te ku 11 di aprel, ta presente atrobe riba tur e islanan karibense – Saba, Sint Eustatius, Sint Maarten, Aruba, Kòrsou i Boneiru – pa duna informashon tokante estudio na Hulanda. Banda di informashon tokante finansiamentu di estudio i BSN, futuro studiantenan i nan mayornan ta tende tambe tur kos tokante asuntunan práktiko ku nan mester regla.
Ofisinanan di servisio temporal
Ademas DUO ta habri ofisinanan di servisio temporal riba kada isla, kaminda studiantenan por akudí ku pregunta tokante nan finansiamentu di estudio òf otro asuntu relashoná ku estudio. Aki eks studiantenan tambe por haña informashon tokante pago bèk di nan debe di estudio.
Un ofisina di servisio pa un aña largu na Kòrsou
Pa Kòrsou tin algu otro planiá; E primavera akí DUO ta habri un ofisina di servisio aya pa un periodo di prueba di un aña. E ofisina akí ta brinda sosten èkstra na futuro studiantenan i personanan ku un debe di estudio, pa por brinda nan servisio personalisá durante henter aña. E kolaboradónan ademas ta bai duna informashon na skolnan tambe.
Mas informashon tokante e enkuentronan di informashon i e ofisinanan di servisio temporal por haña riba duo.nl/bezoekcariben.