Preaviso: Yamada pa entregá proposishon (Call for proposals) pa beka di doktorado pa investigadónan karibense

Notisia | 13-05-2025 | 17:39

Segun espektativa, NWO lo saka un ‘Yamada pa entregá proposishon pa Beka’ pa promové den mei, komo parti di e ‘Programa di Investigashon Karibense: un aserkamentu multidisiplinario’. E Yamada ta destiná pa investigadónan graduá, ku ta deseá di hasi investigashon di promoshon ku ta direktamente relashoná ku òf ta relevante pa e islanan karibense di Reino.

Tokante e programa

Na 2013 Ministerio di OCW a krea e Programa di Investigashon Karibense. E ta apoyá investigashon di kalidat haltu ku e meta pa fortifiká e base di konosementu, konstruí kapasidat di investigashon i kontribuí pa atendé ku problemanan sosial urgente den e parti karibense di Reino Hulandes (region karibense).

E Yamada pa entregá proposishon akí ta ofresé beka di promoshon pa investigashon ku:

• Ta oumentá i fortifiká produkshon di konosementu sientífiko den i tokante region karibense;
• Tin impakto sientífiko i sosial riba e islanan;
• Ta ser ehekutá pa gran parti den e region karibense, di manera ku ta garantisá relevansia i konekshon lokal;
• Ta kontribuí na desaroyo a largu plaso di kapasidat i infrastruktura di investigashon den region karibense.

Esaki ta un tremendo oportunidat si bo:

• Ta deseá di optené un grado di PhD na Hulanda òf na un di e siguiente universidatnan: Universidat di Aruba, Universidat di Kòrsou òf Universidat di Sint Maarten;
• A nase òf ta biba aktualmente riba un di e seis islanan karibense di Reino*;
• Tin un diploma di master òf ekivalente;
• Ta motivá pa alkansá un grado di PhD ku ta benefisiá e region Karibense.

Apoyando mas kandidato di e region karibense pa promové, NWO kier yuda fortifiká universidat-, organisashon- di investigashon i retnan di konosementu lokal.

* Esaki ta un eksigensia si bo kier optené un grado di PhD na un organisashon di investigashon na Hulanda. Por haña tur kondishon den e Yamada pa entregá proposishon.

Presupuesto

Pa proyekto por pidi un suma di supsidio di maksimal €350.000. E durashon máksimo di e proyekto proponé ta 48 luna/kuater aña (òf partaim ekivalente).

Último Fecha

• E último fecha pa entregá deklarashon di intenshon ta 24 di yüni 2025, promé ku 17:00:00 CEST/11:00:00 AST.
• E último fecha pa entregá  pre registrashon ta 16 di sèptèmber 2025, promé ku 17:00:00 CEST/11:00:00 AST.
• E último fecha pa entregá proposishon kompletu ta 24 di febrüari 2026, promé ku 17:00:00 MET/12:00:00 AST.

Si bo no a entregá deklarashon di intenshon, no ta posibel pa entregá un pre registrashon.

Kiko ta un deklarashon di intenshon?

Un aplikashon ta kuminsá ku un deklarashon di intenshon, siguí pa un fase di preaplikashon, aplikashon kompleto i un entrevista. Ku un deklarashon di intenshon bo ta duna di konosé ku bo tin intenshon di entregá un petishon pa e Yamada pa entregá Proposishon akí. Ku e deklarashon di intenshon NWO por determiná e kantidat di aplikashon ku por spera. E deklarashon di intenshon akí no ta parti di e prosedura di evaluashon, pero ta obligatorio i mester entreg’é promé ku e último fecha (wak párafo Último Fecha).

Den e deklarashon di intenshon akí nos ta pidi informashon mas detayá tokante e organisashon di investigashon pa promoshon i guia di deseo (promotor responsabel, ko-promotor i/òf guianan (diario)) relashoná ku e proposishon di investigashon deseá. Den e pre registrashon bo por hasi kambio ainda den bo tim di investigashon i guia. Si bo no a entregá un deklarashon di intenshon (i anekso obligatorio), no ta posibel pa tuma parti na e prosedura di entrega.

Finansiamentu

Ta publiká e Yamada pa entregá proposishon akí, inkluyendo kriterio di atmishon, kondishon adishonal i prosedura di aplikashon entrante fin di mei riba e wèpsait di NWO. Mas informashon ta disponibel pronto riba e página di finansiamentu. Bishitá e página di finansiamentu

Deskargo di responsabilidat (Disclaimer)
Esaki ta eksklusivamente un anunsio di un programa di investigashon di NWO. E posibilidat pa pidi finansiamentu ta habrí pa públiko despues di publikashon di e Yamada pa entregá proposishon den Staatscourant. Den e Yamada pa entregá proposishon por haña tur kondishon.