Entrante e luna aki DUO lo notifiká (eks) studiantenan tokante kompensashon
(Eks) studiante ku a studia na Hulanda den enseñansa avansá bou di e sistema di fiansa durante un aña òf mas, no a risibí un beka básiko durante e periodo ei. Dor di esei kisas nan mester a fia sèn èkstra na DUO. Pa yuda e studiantenan ku esaki, nan lo haña un kompensashon finansiero.
Tin 2 kompensashon ku studiantenan ku a studia bou di e sistema di fiansa (di sèptèmber 2015 te ku ougùstùs 2023) por tin derecho riba dje: kompensashon pa e beka básiko pèrdí i supsidio di bòn di estudio. Un di e kondishonnan pa bini na remarke pa esaki ta ku e studiante mester a optené un diploma (final).
Kompensashon beka básiko pèrdí
Si nan ta kumpli ku e kondishonnan, (eks)studiantenan lo risibí e kompensashon beka básiko pèrdí. Esaki ta un suma di € 34,17 pa luna. Lo kompensá esaki ku un posibel debe di estudio, òf pag’é si no tin un debe di estudio.
Kompensashon bòn di estudio
(Eks) studiante ku pa promé biaha a risibí finansiamentu di estudio den e promé 4 añanan di estudio bou di e sistema di fiansa, fuera di e kompensashon pa e beka básiko pèrdí tambe tin derecho riba e kompensashon bòn di estudio. Esei ta un pago di un biaha so di € 2.098 E suma aki tambe lo kompensá ku un eventual debe di estudio, òf pag’é si no tin un debe di estudio.
Mensahe personal òf hasi petishon bo mes
Na yanüari eks studiantenan ku ta kumpli ku e kondishonnan lo risibí un mensahe personal, si DUO ta disponé di nan datonan. Studiantenan ku ta optené nan diploma despues lo haña un mensahe despues ku e instituto di enseñansa a hasi entrega di nan diploma.Studiantenan ku no a hasi uso di finansiamentu di estudio òf e produkto di biahe di studiante mes mester hasi petishon pa e beka básiko ku a pèrdí.
Pa mas informashon tokante kompensashon por haña esaki riba: duo.nl/tegemoetkomingleenstelsel
Na nòmber di e Ministerio di OCW, DUO ta ehekutá entre otro lei areglonan riba tereno di finansiamentu di instituto di enseñansa, pago i kobransa di finansiamentu di estudio i kompensashon gastu di skol, i ta pèrkurá pa e proseso di rekonosementu i legalisashon di diploma.