Kampaña violensia doméstiko: Maltrato
Den e pelíkula akí nos ta para ketu na tantu violensia físiko komo mental. Na skol Dion ta mira kon kariñoso e mama di un di su amigunan ta. Esei ta un diferensia grandi ku lokual e ta eksperensiá na kas. Su mama konstantemente no ta hasi kaso di dje i ta dal e regularmente. No ta duna Dion kalor, afekto òf siguridat.
Hopi biaha hende ta inkliná pa kondená mayornan ku ta dal nan yunan i ta konsiderá nan mal mayor. E mayornan akí sinembargo tin nan propio historia i hopi bes nan mes komo mucha a ser maltratá. P’esei nan no tin un bon idea kon di forma positivo bo por trata bo yu komo mayor. Di frustrashon nan ta bai bèk e ora ei na loke nan konosé, ounke den profundo di nan kurason nan lo ker a hasi otro. Si bo laga e mayornan akí konta nan storia i puntra nan por ehèmpel ki espektativa nan tabata spera di nan mes komo mayor ora nan yu a nase, kasi sèmper bo ta tende ku nan ke sòru bon pa nan yu i no ke hasi nan daño. Den terapia narativo ta duna atenshon na e problema ku bo ta komportá bo mes otro ku bo yu ku loke realmente bo ke. E problema ta sintá den e komportashon, i komo persona bo ta mas ku esei so. Ta posibel pa kambia bo komportashon. Bo por haña ayudo serka CJG kon pa bo anda di otro manera ku bo yu.
'Maltrato por tin efektonan duradero riba desaroyo emoshonal di un mucha. Formashon di relashonnan harmonioso ku otronan por bira difísil pa e muchanan akí awor i den futuro.'
Nos a hasi Areina Martina algun pregunta. E ta traha na JGCN òf Kuido pa hubentut i a spesialisá su mes den tratamentu narativo. Partikularmente riba tereno di violensia doméstiko, maltrato di mucha i guia di outor.
Areina, suponé ku bo hañá bo konfrontá ku e kaso di den e pelíkula. Kon bo ta apliká aserkamentu narativo den e kaso ei. Ku otro palabra, kon abo lo duna ayudo?
Den di e aserkamentu di terapia narativo nos ta traha ku un manera di duna guia orientá riba pregunta. E dunamentu di guia ta tuma lugá a base di pregunta na lugá di duna konseho sin ku a pidí esaki. E propio storia i propio idealnan ta importante den esaki. Mi ta entablá e kombersashon di diálogo ku e yu i e mama i ta duna atenshon na e relashon i e konteksto entre nan. Lo mi puntra e mama por ehèmpel si e mes tambe ta eksperensiá e violensia ku e apliká komo un problema. Kiko e ta opiná di esaki? E ta denominá loke ta pasa tambe komo ‘violensia’? Si no ta asina, kon e ta yam’é? Si ta asina, kiko ta su storia òf storianan di violensia? Kua idealnan e tabatin na momentu ku e yu aki a nase i awor? Mi ta hasi e mucha preguntanan similar.
Dor di hasi e preguntanan akí huntu ku e mama i e yu nos ta klara kon nan ta pensa den e storia i konstrukshon. I kon e storia i konstrukshonnan akí por ta múltiple, distinto òf te asta kontradiktorio. Por ehèmpel ta sinti frustrashon, pero na mes momento tin bon intenshon. E aserkamentu akí ta duna un bista kon e mama, e yu i e instansia di ayudo ta relashoná ku otro i ku e besindat. Kua kordinashon ta garantisá mas kooperashon i siguridat? Importante ta kon konvisente e storia pa futuro ta di e mama i e yu i te kon leu e instansia di kuido por duna sosten na e storia i deseonan di e mama i e yu.
Ku otro palabra: den e kombersashon di diálogo mi ta duna sosten na e propio storia i ideal. E storia akí ta bisa tur kos tokante ken e ta? Kon el a bira loke e ta awor? Kon nos por kibra esei na un manera positivo? Ki ora ta seif pa su yu? Kiko ta lo mas importante ku mester logra riba e tereno akí? Ken di e propio besindat por yuda realisá e idealnan? I e idealnan akí ta kumpli ku e eksigensianan di siguridat di e instansianan?
Si nos nos asosiá e kliente, e outor òf e víktima ku e problema so, esei ta traha stigmatisante i (èkstra) bergonsoso. Ku storianan múltiple nos ta fortalesé e kooperashon.
Alternativa i profundisashon
Banda di hasi pregunta den forma di wega serka e mucha, mi por investigá kon ta pará ku siguridat. Un pòpchi di un super héroe òf un peluche lo por yuda? Por ta asina tambe ku nos ta duna e problema un forma, grandura i koló ku klei. Di e forma ei literalmente nos ta pone e sentimentu desagradabel, e eksperensianan fastioso separá (lòs di e yu) riba mesa pa investigá esaki apart.
Den e aserkamentu akí mi tin atenshon pa (storia di) e mucha i e adulto. Ta asina pues ku e mama akí tambe ta formá pa su edukashon, besindat, norma- i balornan. Si el a lanta den un ambiente insigur, por ta difísil pa e mes duna edukashon bon i responsabel. Kon grandi e siguridat tabatá den su edukashon? Kiko el a deseá komo mucha?
'Loke bo ta siña rekonosé di bo propio edukashon, besindat i rekuerdo, tur loke ku a forma bo, pero kisas tambe a lastimá bo. E storia ei ta yudá bo den hasimentu di otro eskoho i desaroyo di ideal i balor.'
Un alternativa ta ku despues di e kombersashon akí mi ta skirbi un karta pa e mama i e yu den kua mi ta duna un resúmen di e kombersashon. E ora ei nan por lesa bèk kon nan por duna ehekushon na nan ideal- i akshonnan. Partikularmente sentimentunan positivo ta bin dilanti manera di bon kuido, union i amor. Mi ta enfatisá konosementu i abilidatnan positivo di ámbos, banda di e etikèt di ’mal mayor‘ i ‘víktima’ i ta varia pues den múltiple sentido.
Areina, bo por splika un tiki mas tokante terapia narativo?
Terapia narativo ta sali for di e prinsipio ku nos komportasho ta surgi for di kon nos ta formá i ta enfoká riba kibra patronchi bieuw. Nos ta sali for di e prinsipio ku nos kondukta ta numeroso i ta ser determiná pa nos propio storianan i storianan di den nos besindat. Storianan ku nos ta kompartí ku otro i ku ta pegá den nos kabes i tin bes ta tene nos mes prezu. Básikamente mi ta desaroyá storianan nobo huntu ku kliente i nan besindat, pero partikularmente storianan ku ta liberá.
Ta hasi uzo di konosementu di e persona ku ta pidi ayudo mes, ku ta sòru pa mas espasio pa ekspresá ideanan positivo, speransa i intenshonnan.
