Kampaña violensia doméstiko: Violensia kontra hende hòmber

Den e pelíkula akí nos ta mira kon dos persona a pèrdè e balansa den nan relashon. Un tempu nan tabata teenagernan enamorá.

Nelson i Sharine tabata huntu den klas. Hopi rápido Sharine a laga su bista kai riba dje. Sharine, bendishoná ku un kièr fuerte i ku ta mòndu, no a pèrdè pa gana i promé ku Nelson a realisá un ke otro, e tabata un hòmber kasá. E matrimonio a kuminsá bon i Sharine tabata kier a forma un famia grandi, esei tabata su soño hopi tempu, ya for di mucha. E matrimonio a bira tenso ora a resultá ku no tabata posibel pa e karga e embarasonan te na final. Despues di a pèrdè yu diferente biaha, e relashon entre Nelson i Sharine a kambia drástiko. 

“Un bida chikiritu ku ta kresiendo den mi barika bou di mi kurason ku ta batiendo. . Un bebi pa tene i stima, esei ta tur loke mi ta deseá. E no ta pa mi. Esei ta kaba ku mi. Manera un mònster ku ta habraká, e doló ta huña mi i ta mordé mi. E ta kome mi di paden i niun hende ta mir’e.”

Sharine no sa kiko pe hasi ku su fèrdrit. E no ta laga e mundu eifó ripará nada. E ta trata di yena su bida dor di tira bista hopi pa yunan di famia- i amigunan, pero paden e doló di su propio bida sin yu ta destros’é. E ta baha su amargura riba su kasá.

“E manera ku e ta wak mi. Un bista yen di desaprobashon, de fakto un bista di repudio, esei ta doloroso! Mi ta trata realmente di hasi mi bèst. Mi ta traha i ta kontribuí ku mi parti na kas, mi ta trata na keda trankil, pero nada no ta bon. E no por hasi nada otro ku grita mi so.”

geweld tegen mannen 3

E maltrato mental poko poko a drenta bou di kueru di Nelson i Sharine. Na promé instante Nelson tabata trata di yuda Sharine. E ta komprondé kon profundo su fèrdrit ta, pero despues ku e embaraso a frakasá pa di dos bes, Sharine poko poko pero sigur a kuminsá bira lomba pa su kasá. Esei a kuminsá ku insinuashonnan sutil di parti di Sharine. Puñanan chikitu den kua e ta duna Nelson e kulpa di e embarasonan ku no a karga te na final. Su ekspreshonnan negativo ta kita atenshon di Sharine un ratu for di su doló.

E humiashon ku su kasá mester soportá ta bira mas i mas grave. Poko poko pero sigur e maltrato mental ta haña forma, un kanaster ku Nelson a kana drenta sin ku e tabata konsiente. E no sa mas kon pa reakshoná i e tambe ta lucha ku e situashon. E realidat di Sharine poko poko a bira su realidat. Su konfiansa propio a disparsé. E ta sinti ku e no bal nada mas. A bira algu natural ku e ta ser dominá i ku ta grit’é.

geweld tegen mannen 2

Huntu nan a yega den un spiral negativo unda akusashonnan i komportashon sin rèspèt a bira normal. E límitenan di komportashon normal a disparsé i mas i mas Sharine ta sigui ku su komportashon dominante, inkonsientemente apoyá den esaki pa e forma kon su kasá ta reakshoná.

Nelson su energia a kambia. No a sobra nada mas di e hòmber kariñoso i amoroso. El a bira un hòmber insigur, kouteloso, un tiki angustioso. Konstantemente alerta pa e siguiente zundrá di Sharine. Pa motibu di Nelson su komportashon Sharine na su turno ta bira kada bes mas i mas violento. Ámbos a pèrdè grep i ta pegá den un patronchi ku ta difísil pa kibra.

Riska superá bèrgwensa 

Ta konsiderá maltrato di hende hòmber un tabú grandi. E stap pa raportá esaki ta unu hopi grandi. Hopi hende no ta komprondé ku hende hòmber, ku generalmente tòg ta físikamente mas fuerte ku un hende muhé, ta laga nan humiliá òf dal e. Masha lihé ta kla pa desaprobá òf hasi chèrchi di esaki. 
Preshon sosial ta preskribí ku hende hòmber mester ta fuerte i ku nan mes tin ku aktua pa buska solushon pa problemanan. E konsekuensia di esaki ta ku e drèmpel pa raportá violensia doméstiko posiblemente ta bira mas haltu ainda.

Ki tipo di yudansa tin disponibel?

Den kaso ku di maltrato, ta posibel e ora ei pa sigui boluntariamente e entrenamentu ’Kas Sigur‘. Den un kantidat di seshon ta trata temanan manera rekonosé sentimentunan, rabia, balornan, skucha, tuma un time-out na tempu pa prevení ku kosnan ta eskalá, pero tambe konfiansa den bo mes. E entrenamentu ta dirigí partikularmente riba komportashon di ‘esun kulpabel’ ku den e kaso akí lo mester ta Sharine, kaminda ta embolbí e víktima tambe. E ta un trayekto intensivo i pa kua por hasi un petishon via Ofisina Yudansa pa Víktima, Sentro pa Hubentut i Famia òf Aserkamentu integral di Bario.

Un otro opshon ta pa via di e dòkter di kas pidi un referensia pa un sikólogo pa kombersashonnan. E ora ei por wak e motibunan personal i por ofresé terapia relashonal.

Si ainda no ta trata di violensia, pero si di un balansa inkorekto den e relashon, Sentro pa Hubentut i Famia tambe por ofresé ayudo. 

geweld tegen mannen 4