Kampaña violensia doméstiko: Violensia kontra mayor di edat

Pa loke ta trata e kasonan registrá, práktikamente tur a yega na konosementu di instansianan di ayudo danki na bisiñanan alerta. Hopi bes Ofisina Yudansa pa Víktima ta tende no ofishal ku ta papia di situashonnan ku por tin di aber ku violensia, pero por ta hopi difísil partikularmente pa e víktima pa hasi un denunsia. No ta riska hasi esei. Ta duna komo reakshon e ora ei: “Mi no por, pasobra ta mi yu!”​

Un spesialista ta duna splikashon di e kaso akí

Nos a pidi Inge Berben (ku a studia ayudo sikososial i ku ta trainer di e grupo piloto di violensia doméstiko) komo eksperto pa profundisá mas den e materia. Kon ta yega dje leu ei i kiko nos komo komunidat ta opiná? Nos ta tira un bista fiktisio den bida di e tata i yu hòmber den e pelíkula kòrtiku.

Penshun den man di e yu

E tata ta sinti ku su kurpa i mente ta birando mas suak. Esaki ta pone ku e ta sinti su mes vulnerabel. E mundu rondó di dje ta kambiando. Pa ta sigur ku tur kos ta kana bon, el a pone su penshun den man di su yu. Su yu ta adikto i ta uza e plaka di penshun pa otro meta. E hòmber ta den pèrtá i pa e motibu ei e ta sinti su mes hopi solitario.
 
“Kiko a pasa kuné ku el a kai asina? Kiko mi a hasi robes? Ta pa motibu ku su mama a move bai tempu e tabata asina yòn ainda? Nos tabata asina yòn ainda … Tòg sèmper su wela òf bisiña a kuid’é tempu e tabata chikitu. E tempu ei ainda tabata parse manera mi no tabata pará mi so. Awor, sinembargo, mi no sa mas. Tur hende ta okupá. Okupá ku trabou; okupá ku nan mes bida”.​

Individualisashon na Boneiru tambe

E grado ku hendenan ta sinti nan mes uní ku otro den sierto bario, domisilio, pais òf isla ta determiná e sensashon di bienestar di e individuo. Abo ta kompartí e opinion akí?
Boneiru tambe ta krese rápido. E desaroyonan riba e isla i den mundu ta suheto na individualisashon. Kaminda tur hende tabata konosé otro un 20 aña pasá, tabata keda biba den e bario kaminda el a lanta i lasonan familiar tabata pará sentral, bo ta mira awor tambe ku famianan ta repartí mas riba e isla i den mundu. Tin un oumentu den kresementu di e poblashon i un oumentu di diferente kultura. Esei ta pone ku relashonnan por kambia.

Biba ku otro den soledat

Ounke individualisashon tin sigur un kantidat di bentaha tambe, e otro banda doloroso ta visibel tambe den e soledat, e isolashon, e bèrgwensa i un oumentu di komportashon ku no ta aseptabel. 

“Mi ta mira ku kuido na kas a kaba drenta e kas. Danki Dios! Mi tabata masha preokupá pa mi bisiña. Si su yu hòmber no tabata ‘chòler’ asina, sigur lo mi a bai yuda. E úniko kos ta ku e mucha hòmber ei ta duná mi miedu, su mirada. E adiktonan ei por hasi kos straño. Mi no ke problema den bario òf den mi kas. Mi tambe tin yu”.
 

E ora a yega. Ora pa papia ku otro tokante kiko ta un embolbimentu sano. Ki ora bo ta un bon bisiña i ki ora bo ta un metedó den asuntu di otro hende? Komo siudadano yuda e otro persona òf pidi un profeshonal pa yudansa ta un señal di kurashi i no di metementu den asuntu di otro hende.

E promé paso pa kibra e sírkulo visioso ta di hasi kontakto. Kontakto ku tur esnan konserní – sea ta yama e personanan akí malechor òf víktima – den kaso di violensia ta tur hende ta sufri. Ta hendenan ku ta den pèrtá. Abo no mester tin e solushon. Bo mester tin e kurashi pa buska kontakto for di bo kurason, pa mustra bo kompashon i pone bo orea pa skucha. Pone e promé paso importante ei, esei nos tur por.

Kua profeshonal ta ofresé bo e yudansa?

E vishon di e grupo piloto di violensia doméstiko ku representashon di entre otro e organisashonnan, Kuido pa Hóben, Sentro pa Hubentut i Famia, Integrale wijkaanpak i Yudansa pa Víktima ta, ku dor di embolbimentu di e seno sosial òf kreashon di un seno sosial, por duna un aporte di tal forma ku violensia ta baha. E meta final ta ku violensia ta stòp.

Promé ku por hasi uso di un seno sosial ta importante pa e esnan ku ta duna asistensia sosial, krea un relashon ku e hòmber di edat avansá i su yu hòmber. Huntu ta wak kua problema tin i kua ta e situashon deseá. Ken ya kaba ta forma parti di e seno sosial i ken lo por embolbí. Por ta bisiña, un pastor, konosí, pero tambe ousiliante profeshonal. Tur e personanan akí ta keda aserká dor di ousiliante òf dor di e propio hòmber di edat avansá i su yu hòmber. Ora kaba inventarisá esaki, ta wak den estrecho kooperashon ku e seno sosial kua ta e puntonan di akshon. Ken ta tuma kua responsabilidat i ken ta duna kua sosten. Un persona, mayoria bes e asistente sosial ku ta guia e famia, ta tuma e koordinashon riba dje i tin kontakto regularmente ku tur esnan konserní pa vigilá si ta kumpli ku e palabrashonnan.

E mayor pobresa ta e falta di kontakto real

Manera ku e ta deskribí, e ta parse un proseso simpel. E práktika ta resultá di ta mas difísil. E isolashon ku bo ta den hopi bes ta resultado di bèrgwensa. Ora un persona tin bèrgwensa, pa nos ta mas fásil pa wak den otro direkshon. Hasi manera bo no ta mira, pa motibu ku bo tin miedu ku e yu hòmber lo rabia, òf ku e hòmber di edat avansá ta desmentí ku tin un problema. 

Pa kibra e sírkulo visioso di abuzo i violensia, ta di vital importansia pa kibra e isolashon. Pa e hòmber di edat mas avansá, pero tambe pa e yu hòmber. Tur kos ta kuminsá ora hasi kontakto. For di kontakto ta nase relashon, for di relashon ta nase konfiansa, for di konfiansa ta nase perspektiva.