Bateria i bateria ku por karga

Nò, ku uso normal bateria no ta peligroso. Pero bateria i bateria ku por karga por forma un peliger di kandela sí ora nan bini den kontakto ku awa òf ora no karga nan di e manera korekto i seif.

E riesgo di mas grandi riba kandela den aparato eléktriko ta presentá ora di karga un aparato. Akibou bo ta haña un kantidat di tep tokante karga seif:

• Solamente usa e chardjer original ku ta suministrá huntu ku e aparato. Ora di usa un chardjer di un otro marka òf aparato, e riesgo pa e bateria kima ta mas grandi. P’esei sea kuidadoso ku chardjer ku no ta original.
• Ora di karga, pone un aparato (òf bateria) su so riba un lugá stabil, ku no por kima. Por ehèmpel, no pone bo telefòn riba bo kama ora di karga!
• Karga aparato regularmente. Pasobra un bateria ku por karga ta bira bashí hopi slo, tambe ora bo no us’e. Ora un bateria ku por karga ta kompletamente bashí, tin bia bo no por karg’e (bon) mas. Esaki yama deskargo profundo.
• Ora laga un chardjer den stòpkontakt muchu largu, tin un riesgo di ‘karga demasiado’. E aparato ta bira muchu kayente e ora ei, loke por kousa kandela. P’esei, saka un aparato for di e chardjer ora e bateria di e aparato a yena.

E riesgo di mas grandi den uso di bateria ta ora ku e bateria keinta muchu lihé. Keintamentu por hiba na un situashon ku e reakshon ta aselerá su mes, dor di kua e aparato ta keinta demasiado i por pega kandela. Den un klima kalor aparato eléktriko ta keinta mas lihé i bateria i bateria ku por karga ta gasta mas lihé. Pa e motibu ei, nunka laga bo telefòn den lus di solo direkto òf den un outo kayente.

Tambe lesa e instrukshonnan di seguridat pa uso korekto di bo aparato eléktriko. I bo aparato a kai, daña òf keda deformá? Laga un spesialista kontrolá esaki mas pronto posibel. Daño di un bateria ta oumentá peliger di kandela.

Tin diferente señal ku ta duna bo di konosé ora un bateria por karga òf un bateria tin un problema. Ora bateria lithium-ion pega kandela, gas tóksiko ta bini liber. Si bo rekonosé un òf mas di e señalnan akibou, stòp mesora ku uso di e aparato i kit’e for di e chardjer:

• E bateria òf bateria ku por karga ta lèk líkido.
• E aparato ta keinta (demasiado).
• E aparato ta manda un holó fuerte di kímiko òf di kandela. Un bateria ku por karga ku no ta dañá no ta manda holó.
• Karakterístika di kandela, manera huma i/òf chispa.

Den kaso ku bo rekonosé un òf mas karakterístika di un bateria ku por karga òf bateria kibrá, tin un kantidat di akshon ku ta importante:

• Stòp inmediatamente ku uso di e aparato i kita e aparato for di e chardjer
• Hiba e aparato pafó i ten’e leu for di material inflamabel. Paga tinu: hasi esaki solamente si por hasié di un manera seif!
• Yama 911 si surgi desaroyo di huma òf kandela. Tambe si tin duda: yama 911!

Paga tinu: tòg bo ta haña bo ku korto sirkuito òf kandela den aparato eléktriko? Usa un deken spesial pa paga kandela òf un aparato spesial ku ta paga dióksido di karbon. Klek aki pa mas informashon tokante medio pa paga kandela.

Bo no por tira bateria afó sin mas den baki di sushi. Nan por kontené materia ku ta dañino pa medioambiente. Bo por entregá bateria normal di kas, bateria di ku por karga pa kámara di potrèt i video, i bateria industrial serka e kompanianan di prosesamentu di sushi indiká pa esei.