Konseho di Minister di Reino ta reuní relashoná ku orkan Irma
Awe Konseho di Minister di Reino na Hulanda a reuní pa papia riba e situashon aktual na e islanan Sint Maarten, Saba i St. Eustatius ku a keda gravemente afektá pa orkan Irma.
Den Konseho di Minister di Reino a papia tokante mantenshon di órden públiko i e yudansa di emergensia pa e tres islanan.
Aki ta trata primeramente di distribushon di produktonan di promé nesesidat (awa i kuminda) i artíkulonan di emergensia pa hendenan ku no tin dak riba nan kabes. Prioridat ta tambe reparashon di e parti vital di infrastruktura i kuido di salú (prevenshon di epidemia di malesanan kontagioso i reparashon di e hospital na St. Maarten).
Tambe a papia tokante kiko ta nesesario pa den e periodo binidero abitantenan di e tres islanan por kontinuá nan bida mas mihó posibel. Timnan di Hulanda ta na St. Maarten, Saba i St. Eustatius i huntu ku outoridatnan lokal i dunadónan di ayudo ta inventarisando kiko ta nesesario.
Hulanda, Kòrsou i Aruba ta hasiendo tur loke ta na nan alkanse pa duna yudansa. Den Konseho di Minister di Reino a palabrá i enfatisá ku paisnan den Reino ta yuda otro, segun esaki ta stipulá den Statuto di Reino Hulandes. Tambe durante di e reunion a yama danki na militarnan, agentenan, dunando di yudansa, boluntarionan di diferente pais i partinan di Reino pa nan esfuerso hasí te awor.
Den Konseho di Minister di Reino ta konsistí di e ministernan Hulandes i e ministernan plenipotensiario di e paisnan outónomo den Reino: Kòrsou, Aruba i Sint Maarten.