Kòmplimènt dòbel pa kompania di konstrukshon
Riba djaweps, 18 di yanüari, den oranan di atardi, KPCN, Koninklijke Marechaussee (KMar) i Inspekshon di Labor a realisá un kontròl na un sitio di konstrukshon grandi den besindario di aeropuerto. E kontròl tabata dirigí riba detekshon di trabou ilegal.
Total a kontrolá 35 trahadó den konstrukshon. No a haña ningun trahadó ilegal. Tur dokumento i atministrashon di e kompania tabata na òrdu. Esaki ta bal un kòmplimènt. Banda di esaki e gran mayoria di e trahadónan di konstrukshon tabata trahadónan lokal. E kompania ta haña ku ta di gran importansia pa pèrkurá pa pone hendenan lokal na trabou. Ku esaki e kompania ta demonstrá ku sigur ta posibel pa realisá un konstrukshon grandi ku trahadó di konstrukshon lokal. Esaki tambe ta bal un kòmplimènt.
E tempu benidero KPCN, KMar i Inspekshon di Labor konhuntamente lo sigui hasi kontròlnan semanal pa asina eliminá trabou ilegal. Di e manera aki ta protehá tambe e merkado di labor lokal, ta kombatí eksplotashon di trabou i ta prevení konkurensia falsu.