Konsulta konstruktivo ministernan di Hustisia Hulanda, Aruba, Kòrsou i Sint Maarten
Awe e ministernan di Hustisia Grapperhaus (Hulanda), Bikker (Aruba), Girigorie (Kòrsou) i Richardson (Sint Maarten) a reuní tokante koperashon den e área di hustisia den Reino. Durante e konsulta naturalmente Grapperhaus a atendé tambe ku e interesnan di Hulanda Karibense; Boneiru, Saba i Sint Eustatius. Pa motibu di e krísis di corona e Konsulta Hudisial di Kuater Partido (Justitieel Vierpartijenoverleg, JVO) e biaha aki no a tuma lugá físikamente sino via un konferensia di vidio, bou di presidensia di Hulanda.
Naturalmente e ministernan a para ketu primeramente na e impakto grandi di e vírùs di corona riba e paisnan i e medidanan severo ku tabata na vigor pa haña e vírùs bou di kòntròl. E medidanan aki no tabatin solamente efekto riba e bida diario pero tambe riba funshonamentu di e kadena di hustisia. E ministernan a enfatisá ku espesialmente den tempu di krísis e bon koperashon riba e tereno di hustisia ta di gran importansia. JVO ta e momentu di kada seis luna pa reforsá e koperashon ei.
Riba inisiativa di Kòrsou a hasi palabrashon pa intensivá e koperashon entre e reshèrshinan di e paisnan Sint Maarten, Aruba, Kòrsou i reshèrshi di Reino. Ku esaki lo mira pa estudionan konhunto, interkambio di eksperto ku otro su timnan di reshèrshi i e ponementu disponibel di lugánan di stazje. Tambe e ministernan a papia tokante e progreso mas aleu pa igualá e protekshon di datonan personal.
Durante di e konsulta di hustisia Aruba a drenta e asina yamá Kolaborashon ICT mantenshon di derecho; awor tur kuater pais ta afiliá na dje. Esaki no ta mehorá solamente e interkambio di informashon na Aruba mes den e kadena di hustisia. E ta promové tambe e koperashon i interkambio di informashon entre e islanan BES, Kòrsou, Sint Maarten i awor Aruba tambe. Por ehèmpel si traha ku sistema di polis i frontera igual, e servisionan lokal por interkambiá informashon (di reshèrshi) mas fásil i mas lihé.
E próksimo JVO lo tuma lugá atrobe bou di presidensia di Hulanda riba 7 i 8 di yanüari 2021.