Areglo di indulgensia ora superá periodo liber dor di siere di espasio aéreo

Debí na e medidanan tumá en konekshon ku e krísis di COVID-19, pa algun tempu no tabata posibel pa biaha for di, òf pa, Hulanda Karibense. Dor di e restrikshonnan di biahe ku a drenta na vigor riba 14 di mart 2020, tin persona ku a surpasá nan periodo liber di estadia sin por a yuda. Koninklijke Marechaussee, IND i Ministerio Públiko a disidí konhunto pa apliká un areglo di indulgensia pa personanan ku dor di restrikshon di biahe, obligatoriamente a permanesé na Hulanda Karibense pa un tempu muchu largu.

Travel

E periodo liber (di estadia) ta aplikabel pa personanan ku no ta residente di Hulanda Karibense. Nan por permanesé na Hulanda Karibense pa un periodo fiho sin un pèrmit di estadia òf un deklarashon di atmishon legal. E durashon di e periodo aki ta dependé di nashonalidat di e persona i den kua pais e ta biba. Si un persona surpasá su periodo liber, e por haña un but durante kontrol na salida.

Dor di e siere repentino di e espasio aéreo riba 14 di mart 2020, pa algun persona no tabata posibel pa bandoná Hulanda Karibense promé ku terminashon di nan periodo liber. Pa e hendenan aki awor tin un areglo spesial. Personanan no-residente ku riba 14 di mart 2020 ainda tabata na Hulanda Karibense denter di nan periodo liber, pero ku dor di introdukshon di restrikshon di biahe no por a biaha, no ta haña but na momento di nan salida si e periodo liber a kaduká durante e durashon di e restrikshonnan di biahe. E persona mester bandoná Hulanda Karibense si mas pronto posibel despues ku biahe ta posibel atrobe for di Hulanda Karibense.

Di personanan ku no ta residente di kua nan periodo liber a kaduká promé ku 14 di mart 2020, ta konsiderá ku nan ta bandoná hulanda karibense mas lihé posibel. E montante di e but dor ku a surpasá e periodo liber, ta oumentá miéntras e durashon di e periodo ta mas largu. Sinemabargo, no ta konta e periodo di 14 di mart te ku e fecha ku a kita restrikshon di biahe.

Dor di e restrikshonnan di biahe, tambe por ta posibel ku un pèrmit di estadia òf pasport di un persona ku a keda pegá, a kaduká. No-residente ku un pasport kaduká por biaha pa e pais di orígen miéntras ku e pais aki ta aseptá e pasport kaduká. Pa personanan di kua nan pèrmit di estadia a kaduká durante e periodo di restrikshon di biahe, outomátikamente e periodo liber ta kuminsá konta i e areglo ariba menshoná ta keda aplikabel.