Konstrukshon di un kazèrne di brantwer nobo na Saba lo kuminsá na luna di Aprel
Lo konstruí e kazèrne nobo riba tereno di aeropuerto Juancho E. Yrausquin. Esaki lo remplasá e kazèrne aktual di brantwer di e Kuerpo di Bombero Hulanda Karibense (BKCN) na e edifisio di terminal di aeropuerto.
E konstrukshon lo kuminsá e promé siman di aprel. E kontratista lokal, Saba Roads and Construction, lo ehekutá e proyekto spesial di konstrukshon aki. Nan lo hasi esaki bou di enkargo di Rijksvastgoedbedrijf (RVB), na nòmber di e Ministerio di Hustisia i Seguridat i den konsulta ku BKCN.
E kazèrne nobo lo duna empleadonan di kuerpo di bombero oportunidat pa realisá nan trabounan na un manera mas efisiente. E lokalidat aktual di BKCN na aeropuerto di Saba ta antikuá i su instalashonnan ta hopi limitá. Por ehèmpel, na e momentonan aki por yena e tankinan ku aire ku bomberonan ta usa pa por paga un kandela, solamente na e lokalidat di brantwer na The Bottom. E kazèrne nobo aki lo trese un kambio na e proseso aki. E kazèrne lo tin un área di trabou separá spesialmente pa aire. Esaki por spar hopi tempu, den kaso di un insidente na aeropuerto. Ademas, e kazèrne lo tin dos garashi kaminda por stashoná dos trùk di paga kandela, un instalashon pa deporte, un kantina pa personal, vários área di trabou i reunion i sufisiente fasilidat pa prepará i ehekutá ehersisio.
Ademas di e nesesidatnan operativo di BKCN, a pone hopi atenshon na aparensia di e edifisio durante diseño di e kazèrne. E kuerpo di bombero ta haña sumamente importante pa aparensia di e kazèrne ta kuadra ku aparensia di e isla. Pa e motibu aki lo konstruí un parti di e kompleho kontra i den e muraya di piedra, na unda esaki ta bira parti di e área natural. Den kolaborashon estrecho ku e arkitekto, Lyongo Juliana (OZ Caribbean), e kuerpo di bombero i RVB, a opta pa usa piedranan lokal, pa asina haña un konekshon ku e karakterístikanan históriko i di arkitektura i tambe e paisahe. Ademas e kazèrne ta konstruktivamente diseñá na un manera ku esaki por resistí orkan di kategoria 5. Ta spera ku e kazèrne nobo lo bira operashonal durante e primavera di 2022.