A enkontrá dos biahero klandestino abordo di un tènker
Koninklijke Marechaussee (KMar) na Boneiru, den koperashon ku e departamento Haven- en Loodswezen di Entidat Públiko Boneiru (OLB), den tramèrdia di djaweps 31 di mart a rekuperá dos biahero klandestino (stowe, na ingles stowaway) for di un tènker. For di Puerto Plata, Repúblika Dominikana, e dos hòmbernan a subi di forma ilegal riba e barku i durante di un biahe di kuater dia nan a haña nan mes riba timon i den e ‘rudder trunk’ di e barku.
Despues di un notifikashon di Haven- en Loodswezen, a hiba kolaboradornan di KMar ku un boto di trabou na e barku di karga riba laman ganchu. Aya e dos hòmbernan a pasa ofer riba e boto di trabou kual despues a trese nan den seguridat. E dos hòmbernan tabata den un estado di salú basta bon. Unabes ku nan a pone pia riba tera, tur dos biahero klandestino a hasi petishon pa asilo, kual despues a pone nan den ‘vreemdelingenbewaring’ na JICN.
Servisio di Imigrashon i Naturalisashon Hulanda Karibense (IND-CN) ta trata e petishonnan pa asilo. Buskadó di asilo por hasi petishon pa asilo mirando situashon (personal) den su propio pais, por ehèmpel pa motibu di guera òf trato inhumano. IND-CN ta tuma un desishon tokante e petishonnan despues ku finalisá e investigashon di e situashon di e dos buskadónan di asilo. E prosedura aki por dura 6 luna segun lei, pero ta kalkulá ku den e kaso aki dentro di algun siman ta tuma un desishon.