Ta bai mantené maneho di parker Airport mas severo

Koninklijke Marechaussee (KMar) den kolaborashon ku Bonaire International Airport (BIA) ta bai kontrolá mas severo riba kumplimentu ku e maneho di parker na aeropuerto. Vehíkulonan mal stashoná ta un problema kresiente riba tereno di aeropuerto. KMar pa e motibu ei ta asistí den mantenshon, i lo parti but pa shofùrnan ku ta violá e reglanan di parker vigente.

KMar handhaving parkeerbeleid BIA

Último simannan Koninklijke Marechaussee den kolaborashon ku BIA a duna atvertensia na shofùrnan di vehíkulonan mal stashoná. Resientemente aeropuerto a pone tambe bòrchi nobo pa indiká bon kla unda por i mag parker. Tòg ainda ta sosodé hopi bia ku outomobilistanan ta parker un vehíkulo riba e parti di ‘kiss and ride’, ku ta destiná pa baha i buska pasahero rápido i fásil. Tambe regularmente bishitantenan ta parker riba e parti destiná pa kore i e parti destiná pa taksi. Esaki ta stroba otro tráfiko innesesariamente. Riba tereno di aeropuerto ta permití solamente pa parker riba e áreanan destiná pa esaki, esta P1 (parker kòrtiku) òf P3 (parker largu). Bonaire International Airport i Koninklijke Marechaussee ta supliká un i tur pa wak e bòrchinan bon i pa sigui reglanan pa parker na aeropuerto.