A habri kancha di deporte di JICN oficialmente
Djaweps 24 di mart, e Direktor di Institutonan Hudisial i di Detenshon di Estranhero (Directeur Gevangeniswezen en Vreemdelingenbewaring), Monique Schippers, a hasi apertura ofisial di e kancha di deporte tan espera di e Instituto Hudisial Hulanda Karibense (JICN). E kancha di deporte nobo ta nesesario pa ampliashon di e programa di dia di detenidonan i ta hunga un ròl importante den e proyekto di reintegrashon ku JICN ta trahando na dje.
Anteriormente no a inkorporá e kancha di deporte den e plan di konstrukshon di e institushon nobo situá na Plantashi Aruba i p’esei a trahe tòg awor. Deporte ta kontribuí na e salú físiko i mental i ta derecho di un detenido stipulá pa lei. Ademas, ehersé deporte den grupo ta un bon manera pa detenidonan desaroyá nan abilidat sosial. Esaki ta forma un parti importante di e proseso di reintegrashon, kual ta dirigí riba preparashon di e detenido mas mihó posibel pa regreso den sosiedat ora e kaba di sinta su kastigu. Apertura di e kancha di deporte ta hasi ampliashon di e programa di dia tambe posibel, kaminda detenidonan por partisipá na aktividatnan èkstra si nan mustra komportashon deseabel.