Prizònnan den region ta kompartí konosementu i eksperensia via di un programa di interkambio

Empleadonan di prizòn for di Sentro di Detenshon i Korekshon Kòrsou (SDKK) na Kòrsou, Korrektie Instituut Aruba (KIA) na Aruba i Justitiële Inrichting Caribisch Nederland (JICN) na Boneiru for di djaluna 29 di ougùstùs ta partisipá den un programa di interkambio konhunto. E prizòn na Sint Maarten, Point Blanche, tambe lo forma parti di e interkambio den un fase mas despues. Meta di e programa aki ta pa entre e diferente institutonan, interkambiá konosementu i eksperensia riba tereno di entre otro re-integrashon i trato di detenido. A skohe JICN komo e sentro di konosementu na unda e interkambio lo tuma lugá.

Justitiële Inrichting Caribisch Nederland

Durante di e interkambio, ta kòpel bewaker (BEWA’s) i trahadó di instituto penitensiario (PIW’ers) di Kòrsou, Aruba i Sint Maarten unu riba unu na un empleado di JICN. Via di e sistema di ‘twin’ (twin-systeem) aki durante di un programa di tres siman e ta haña informashon tokante di diferente departamento, protokòl i e manera di traha dentro di JICN i e tin oportunidat pa kompartí propio manera di traha i idea ku e koleganan na Boneiru.

A skohe e instituto hudisial na Boneiru komo sentro di konosementu pa motibu ku e ta traha riba vários proyekto interesante ku por ta aplikabel pa prizònnan den region. Asina e proyekto “Ban pa Kambio” ta brinda detenido struktura i posibilidat pa desaroyá su mes. E posibilidat pa partisipá den kurso di kapasitashon, trayekto di siña i traha i labor ta oumentá e posibilidat riba un eksistensia despues di detenshon mas aseptabel pa e detenido. Mas aleu tin hopi atenshon pa Detenshon i Re-integrashon (D&R), ku e meta pa prepará detenido mas mihó posibel pa su regreso den sosiedat.

Ta ferwagt ku e programa di interkambio lo kontinuá te ku desèmber, pa duna posibilidat na mas tantu empleado posibel pa traha direktamente huntu ku un kolega for di un di e otro institutonan hudisial Karibense. Direktor di tur e institutonan ta bini huntu na Boneiru riba djaluna 29 i djamars 30 di ougùstùs pa un reunion di direktor i nan lo ta presente na e apertura inisial di e proyekto konhunto aki.