Dos Komandante Lokal nobo pa brantwer Boneiru
For di promé di òktober Kuerpo di bombero Hulanda Karibense (BKCN), lokalidat Boneiru, ta ser dirigí pa no un sino dos Komandante Lokal nobo. Despues di partida di e último Komandante Lokal, Reynold Janga, Gravey Anthonij a asumí enkargo di e funshon aki. Thammy Albertsz i Gravey Anthonij awor lo desempeñá e ròl di Komandante Lokal komo funshon kompartí.
Desempeño di e funshon di komandante den forma duo dentro di brantwer ta algu úniko. A skohe pa e forma aki pa motibu ku kuerpo di bombero kada bes ta sigui eksperimentá mas desaroyo. Por ehèmpel, ta bai implementá sistema di roster i kondishon laboral nobo i kada bes ta organisá kurso di formashon pa e personal di brantwer, pa sigui profeshonalisá e kuerpo. Albertsz i Antonij ta spera ku huntu nan lo guia e desaroyonan aki den bon direkshon. E funshon di Komandante kompartí ta duna ámbos ofisial oportunidat pa sigui desaroyá su mes aun mas komo dirigente na brantwer.
Thammy Albertsz ta traha na BKCN for di 2018. Komo profeshonal yòn entusiasmá e ta bai enfrentá e desafio aki yen di energia:
“Ta un honor pa por desempeñá e ròl di Komandante Lokal di Boneiru huntu ku Gravey. Huntu nos ta bai enfrentá e desafio aki, no solamente na interes di e kuerpo, pero na interes di e siguridat di Boneiru, huntu ku nos partnernan di kadena.”
Gravey Anthonij ya tin bintisinku (25) aña den servisio di brantwer, di kua e último dos (2) añanan el a asumí enkargo di e funshon di Komandante Lokal. Ku su karera largu den e kuerpo, pero tambe den otro parti di brantwer, el a atkerí hopi konosementu i eksperensia. Gustosamente e ta kompartí esaki na pia di trabou i di e manera aki kontribuí positivamente na desaroyo dentro di e kuerpo di bombero.
BKCN ta orguyoso ku e forma di funshon aki por ta posibel i ku Albertsz i Anthonij huntu por bai sigui desaroyá e kuerpo na Boneiru.