KMar ta nota efekto di oumentu di biaheronan pa Hulanda Karibense
E kantidat di biahero ku a biaha for di i pa Hulanda Karibense a krese konsiderablemente den 2022, kompará ku e aña anterior. Por a mira esei bèk den e trabounan di Marechaussee, entre otro den oumentu di e kantidat di persona ku na nan entrada na Hulanda Karibense a keda rechasá, pero tambe den e kantidat di estranhero ku a keda muchu largu na Hulanda Karibense.
Koninklijke Marechaussee (KMar) ta responsabel pa vigilansia di frontera i ta kontrolá entre otro ku kua meta biaheronan ta bin e islanan i si ora nan sali nan no a permanesé muchu largu na Hulanda Karibense. Ora biaheronan ku no ta biba na Saba, Sint Eustatius òf Boneiru bishitá un di e islanan akí, ta averiguá entre otro meta i durashon di e biahe ora nan drenta. Koninklijke Marechaussee ta kontrolá si intenshon di un biahero no ta pa keda mas largu ku legalmente ta pèrmití.
Tambe ta kontrolá si ta bin Hulanda Karibense ku un propósito legítimo, òf si ta kore riesgo ku e personanan ta resultá den trabou ilegal òf kriminalidat. Ku oumentu di e kantidat di pasaheronan ku ta yega, e kantidat di persona ku nan entrada na Hulanda Karibense a keda rechasá tambe a oumentá.Si den 2021 a rechasá entrada na 68 persona, esaki a sosodé en total 115 bia den 2022.
KMar ta kontrolá tambe si ora un persona drenta e tin sufisiente medio finansiero pa sòru pa su propio mantenshon durante un estadia. Si akaso un persona no por proba esei, por mara kondishonnan na e atmishon, manera por ehèmpel un obligashon pa mèldu na Imigrashon di Kuerpo Polisial Hulanda Karibense (KPCN). Na 2021 a atmití 121 persona bou di kondishonnan spesial, na 2022 nan tabata 256, mas di dòbel mas tantu.
Den kaso di pasaheronan saliendo, KMar ta kontrolá si nan no a keda mas largu i asina a surpasá e periodo liber. E periodo akí, ku ta determiná kuantu tempu un persona por keda na Hulanda Karibense komo turista, ta diferensia segun nashonalidat. Por ehèmpel personanan ku nashonalidat merikano òf hulandes por permanesé 180 dia den un periodo di 365 dia. Dependiendo di e nashonalidat, un periodo liber por ta tambe 90 dia pa kada 180 dia òf por tin un obligashon di visa na vigor. Den kaso ku violá e término liber por duna un but. E montante di e but ta dependé di e kantidat di dia ku kua ta surpasá e periodo liber.
Koninklijke Marechaussee ta enfatisá importansia di un bon preparashon ora ta bai di biahe i ta enkurashá tur hende pa averiguá bon kua kondishonnan ta na vigor pa drenta na e destinashon. Riba www.rijksdienstcn.com por haña mas informashon tokante biahamentu pa Hulanda Karibense i tokante e periodo liber pa kada nashonalidat.