Aspirantenan di Koninklijke Marechaussee ta finalisá promé fase di estudio
Riba djaweps 4 di aprel e 15 aspirantenan di Koninklijke Marechaussee a finalisá e promé fase di nan estudio, kual ta un bivak.
E bivak a ranka sali riba djamars 2 di aprel, primeramente ku un tarea klasikal, despues di kua nan a risibí e material nesesario pa por pasa dor di e bivak. Despues di esaki nan a sali rumbo pa e sitio di bivak kaminda na a prepará na kampamentu, a kushina huntu i anochi a será konosí ku otro i maneho di Koninklijke Marechaussee na Boneiru. Riba djárason 3 di aprel nan a hasi un tarea enfoká riba traha huntu na Sorobon, kaminda a traha dos grupo pa nan traha un vlòt ku kua nan mester a subi laman. Nan sera e anochi riba Seru Largu ku un ‘exercitie training’ i un ‘speedmars’. Riba e último dia, djaweps 4 di aprel, nan a hasi trabou voluntario na Fundashon pa Kuido di Personanan Desabilitá (FKPD).
Den oranan lat di atardi nan a mars for di direkshon sùit rumbo pa warda di polis, kaminda Koninklijke Marechaussee tambe ta aloká, kaminda famianan a risibí nan kalurosamente. Aki un seremonia a tuma lugá durante kua e coachnan di e organisashon Velitt, ku a guiá e bivak, a entrega e aspirantenan bek na e maneho di Koninklijke Marechaussee. Despues di esaki tur presente por a kombersá den un ambiente ameno ku algu di kome i bebe, tokante e eksperensianan spesial.
Djabièrnè 5 di aprel e 15 aspirantenan ta Sali pa Hulanda pa 3 luna pa sigui e siguiente parti di e estudio na Kazerna Koning Willem III na Apeldoorn. Di e 15 aspirante, 3 ta prosedente di Sint Eustatius, 1 di Saba i 11 di Boneiru.
