Huntu alerta pa trafikashon di hende: entrenamentu a kuminsá na Boneiru
Siman pasa di 14 te ku 17 aprel a tuma lugá na Boneiru e promé entrenamentunan den e programa di aña 2025 kontra trafikashon- i kontrabanda di hende. Profeshonalnan for di e kadena hudisial i di kuido a profundisá nan konosementu riba kon pa rekonosé señalnan i kon pa aktua ora tin sospecho di abuso. E entrenamentunan aki ta marka e komienso di un aña yen di aktividat riba konsientisashon, kolaborashon i akshon.
Riba 14 i 15 di aprel, profeshonalnan den e kadena hudisial a partisipá na un entrenamentu spesialisá riba señalamentu i aserkamentu den kaso di trafikashon i kontrabanda di hende. Riba 16 i 17 di aprel, profeshonalnan den e sektor di kuido a partisipá na e entrenamentu dirigí riba tantu introdukshon komo profundisashon, adaptá na nan praktiká di trabou.
Trafikashon di hende ta un forma serio di abuso ku hopi biaha ta skondí. Ta fòrsa víktimanan bou di preshon, engaño òf menasa, pa traha, hasi akto seksual òf partisipá na aktividat kriminal. Hóbennan ta forma un grupo vulnerabel: por fòrsá nan pa transportá droga, hòrta òf laba plaka.
Durante e entrenamentu, partikularmente e tema tokante uzo di hóben pa kometé e aktonan aki a toka hopi partisipante. E tópiko a habri diálogo tokante maneranan pa rekonosé señalnan den praktiká, i kiko ta e ròl di tur profeshonal den esaki.
Na Sint Eustatius i Saba tambe lo tin entrenamentu pa profeshonalnan mas lat den e aña aki. Esaki lo duna Hulanda Karibense kompletu e oportunidat pa amplia konosementu, señalá e señalnan mas lihé i i pa traha huntu efektivamente den e kadena.hudisial i di kuido.
Algun señal di trafikashon di hende por ta:
- un persona ku no tin kontròl riba su dokumentonan (manera pasport òf ID);
- un persona ku ta parse spantá, dependiente òf será den su mes;
- un hóben ku tin kos karu òf sèn sin un splikashon kla;
- hende ku ta traha sin pago, bou di mal kondishon òf den orario ku no ta lógiko.
Ta importante pa semper mèldu si bo tin sospecho di trafikashon di hende. Esaki por via meil di KPCN: meldmensenhandel@politiecn.com òf via e liña di tep anónimo: 9310.
Pa mas informashon: www.rijksdienstcn.com
Huntu kontra trafikashon di hende – nos islanan, nos responsabilidat.
