Petishon Outorisashon pa Estadia Temporal (MVV)

Di kon e formulario aki?

Bo mes òf un persona di referensia (un doño di trabou òf un miembro di famia di promé grado ku ta biba riba e isla konserní) por hasi petishon pa un MVV. Un persona di referensia mester ta outorisá dor di e petishonario. Si bo ta entregá e MVV bo mes bo mester bandoná e isla dentro di 8 dia i warda e desishon den e pais di prosedensia.

Kua anekso mi mester agregá?

Dependiente di e meta pa kua bo ta pidi estadia, mester entregá dokumento i yena formulario. Kua eseinan ta, ta pará den e lista di dokumento riba e formulario di petishon.

Unda mi ta entrega e formulario?

Bo por entregá e petishon en personana un di e lokètnan di e Unidat di IND Hulanda Karibense. Bo no por warda e tratamentu di e petishon na Boneiru, Sint Eustatius òf Saba. Si bo ta na Boneiru, Sint Eustatius òf Saba durante e entrega di e petishon di MVV, bo mester bandoná e isla dentro di 8 dia. Seguidamente bo ta warda e desishon den e pais di prosedensia.

Kiko ta pasa ku mi petishon?

Si bo a entregá bo petishon en persona na un di e lokètnan di e Unidat di IND Hulanda Karibense i bo petishon ta kompleto, bo petishon ta wòrdu tumá den tratamentu. Si bo petishon no ta kompleto, esaki no por wòrdu evaluá. Bo ta risibí mensahe por eskrito ora a disidí riba bo petishon. Tene kuenta ku un periodo di tratamentu di máksimo tres luna. IND ta aspirá pa finalisá un petishon dentro di dos luna, si bo petishon ta kompleto.

Kiko si mi petishon wòrdu aprobá?

Si disidí positivamente riba bo Petishon pa MVV, bo mester biaha dentro di tres luna despues di a risibí bo MVV, pa Boneiru, Sint Eustatius òf Saba. Dentro di tres dia despues di entrada bo mester hasi un petishon pa un Pèrmit di Estadia serka un di e lokètnan di IND-Hulanda Karibense, pa e meta di estadia pa ku e MVV a wòrdu otorgá.