Stazje

Hulandes- i merikanonan

Si bo tin nashonalidat hulandes òf merikano i ta bai kore stazje riba e islanan BES, e ora ei e siguiente informashon ta relevante pa bo.

Entregá petishon òf no?
Si bo ta bai kore stazje ménos ku tres luna riba e islanan BES, e ora ei no ta nesesario pa entregá un petishon pa un Verklaring van Rechtswege (Deklarashon pa Lei). Bo ta hasi uso e ora ei di e término liber.

Si bo ta bai kore stazje tres luna òf mas riba e islanan BES, e ora ei si bo mester pidi un Verklaring van Rechtswege serka IND. Bo tin mester di e siguiente dokumentonan:

• Formulario di petishon IND
  • MBES08, yená i firmá

• Pasport bálido
  • Bo mester mustra bo pasport original tambe na lokèt

• Prueba di lugá di biba
  • Esaki por ta un kontrakt di hür òf por ehèmpel un karta di bo organisashon di stazje. Si bo organisashon di stazje ta regla estadia pa bo (alohamentu i kuminda), e ora ei mester demonstrá esei por eskrito pa medio di un karta
• Prueba di sufisiente medio di eksistensia
  • Bo kombenio di stazje òf un deklarashon di dunadó di trabou (MBES29) yená dor di e organisashon di stazje. Akiden mester menshoná e periodo di stazje i eventual kompensashon di stazje
  • Resúmen di bo finansiamentu di estudio (DUO). Un resúmen di DUO ku bo nòmber riba kua por mira e altura di bo finansiamentu di estudio

Deklarashon tokante kondukta (VOG)
Si bo a permanesé e último sinku añanan pafó di Reino Hulandes, bo mester presentá un VOG di e pais akí. E VOG mester ta kompañá di un apostia òf legalisashon. Si bo a biba e último sinku añanan únikamente den Reino Hulandes, bo no mester presentá un VOG, pero IND mes lo pidi esaki ofisialmente.

Entrega i prosedura di e petishon
Entrega di e petishon ta posibel di djaluna te ku djaweps, entre 8 i 11or. Por kana drenta òf por traha sita tambe. Si bo ke traha un sita, bo por hasi esaki telefónikamente via +599 715 8330.

E léges pa e petishon ta kosta $129 pa stazjèrnan di nashonalidat Hulandes òf Merikano. Bo por swaip na bali durante entrega di bo petishon. Despues di entregá bo petishon bo ta risibí, si bo ta kumpli ku e kondishonnan, un Deklarashon pa Lei, ku kua bo por demonstrá ku bo tin estadia legal riba e islanan BES.

Si bo tin ku registrá bo mes òf no, ta dependé kon largu bo ta riba e islanan BES. Mas informashon al respekto bo por pidi serka bo munisipio i/òf e departamentu di Asuntunan Sivil di e isla unda bo ta bai permanesé.

Demas nashonalidat

Bo tin un otro nashonalidat (ku no ta hulandes òf merikano)? E ora ei un otro prosedura ta konta pa bo. Pa por kore stazje riba e islanan BES bo organisashon di stazje mester pidi un pèrmit di trabou i di estadia pa bo promé. E tempu di balides di e pèrmit di trabou i di estadia pa stazjèr ta maksimal un aña.

Ta dependé di bo nashonalidat si bo tin ku warda e prosedura den eksterior:

• Personanan ku nashonalidat prosedente di Afrika, Medio Oriente, Asia, Sur- i Sentroamérika i e área karibense: si bo tin un di e nashonalidatnan ariba menshoná, e ora ei promé ku drenta bo mester pidi un ‘machtiging tot voorlopig verblijf’ (MVV). E MVV ta un tipo di visa di entrada.
• Personanan ku tin nashonalidat di Paisnan miembro di Union Oropeo (EU), Paisnan miembro di EER (Espasio Ekonómiko Oropeo), Australia, Canada, Hapon, Monaco, Nieuw-Zeeland, Vatikano, Merka, Sur Korea òf Suisa. Bo tin un di e nashonalidatnan ariba menshoná? E ora ei bo por drenta Boneiru, Sint Eustatius i Saba mesora.

Deklarashon di kondukta (VOG)
Bo mester presentá un VOG di e paisnan kaminda bo a permanesé e último sinku añanan. E VOG mester ta kompañá di un apostia òf legalisashon.

Medionan di eksistensia
Bo mester tin entrada ku ta minimal 50% di e suèldu mínimo bruto. E suèldu mínimo bruto ta diferensiá pa isla i ta stipulá anualmente dor di Asuntunan Sosial i Empleo, mira aki.

Bo entradanan mensual por konsistí tambe di un kompensashon di stazje, finansiamentu di estudio òf un kombinashon di kompensashon di stazje i finansiamentu di estudio. Si bo organisashon di stazje ta paga alohamentu i kuminda pa por pone esakinan tambe aserka. Kondishon ta ku loke tin ariba menshoná ta suma en total minimal 50% di e suèldu mínimo.

Entrega i transkurso di e petishon
Entrega di petishon ta posibel di djaluna te ku djaweps entre 8or i 11or di mainta sin sita of ku sita. Si bo ke hasi un sita, esaki ta posibel via telefon +599 715 8330.

E léges pa e petishon ta kosta $131 pa stazjèrnan ku nashonalidat otro for di Hulandes òf Merikano. Bo por swaip na bali durante entrega di bo petishon. Despues di entrega di e petishon, si bo ta kumpli ku e kondishonnan, bo ta risibí un ‘Verklaring van Rechtswege’ ku kua bo ta prueba bo estadia legal riba e isla Hulanda Karibense.

Si bo mester inskribí, ta dependé kon largu bo ta keda riba e isla Hulanda Karibense. Mas informashon tokante esaki bo por puntra na bo munisipio i / òf na e Departamentu di Asuntunan Sivil di e isla kaminda bo lo keda.