Akshon di realisashon di ILT i RWS na BOPEC

Bonaire Petroleum Corporation N.V. (BOPEC) ta haña tempu te 5 di yanüari 2018 pa demostrá ku nan por atendé ku e retraso serio den mantenshon ku nan tin. Si esaki no logra, e kompania mester hasi nan tankinan di kombustibel i tuberia bashí pa e inspekshon di ambiente di bida i transporte (Inspectie Leefomgeving en Transport (ILT)) na komienso di febrüari 2018.

Deposito di zeta

E akshon aki ta ta kana pareu ku akshon di Rijkswaterstaat (RWS) ku ta enfoká riba uso di pirnan di BOPEC. Sin un bista riba mehorashon, for di mei 2018, BOPEC no tin mag di karga ni deskargá kombustibel for di barku. Esaki ILT i RWS ta skibi den dos karta na e kompania di almasená petrolio na nòmber di Minister i Sekretario di Estado di e Ministerio di Infrastruktura i Maneho di Awa (Infrastructuur en Waterstaat).

BOPEC ta un kompania di almasená Fueloil ku for di 1974 ta establesé na Boneiru. For di 2014 e kompania tin un pèrmit di medio ambiente, pero ta konfrontá ku retraso grandi den mantenshon di nan tankinan di almasená, pirnan,tuberianan i instalashonnan eléktriko. Esaki ta kondusí na riesgonan grandi di siguridat i medio ambiente.  

ILT i RWS durante di un inspekshon den luna di aprel di 2017 a duna BOPEC un atvertensia, i relashoná ku esaki e kompania a traha un plan di rekuperashon, un asina yamá  ‘terminal recovery plan’. BOPEC, un filial di e kompania Venezolano PDVSA, sinembargo no tin sufisiente medionan finansiero pa ehekutá e plan aki.

BOPEC ta entregá kombustibel tambe na e sentral di energia na Boneiru. Pa sigui garantisá e entrega aki a lanta un Taskforce kaminda e Ministerionan di Asuntunan Ekonómiko (EZK), Asuntunan Interno i Relashonnan den Reino (BZK) i Infrastruktura i Maneho di Awa (IenW) ta traha konhuntamente ku Entidat Públiko Boneiru.  Banda di esaki e Taskforce ta traha tambe riba un mehorashon struktural di suministro di energia na Boneiru.

For di 2013 ta realisá inspekshonnan na e tres kompanianan di almasená i transbordo di kombustibel na Boneiru (BOPEC, Curoil Hato i Curoil Airport), pasobra e isla for di 2010 ta un identidat públiko.  E inspekshonnan aki ta keda hasí dor di ILT huntu ku RWS i brantwer  (region di siguridat Rotterdam Rijnmond pa Brantwer Hulanda Karibense).